“Google Maps”in yanlış məlumatı səbəbindən dağılmış körpüdən keçmək istəyən şəxsin ölümündən sonra şirkət ittiham olunmağa başlayıb.

Valyuta.az xəbər verir ki, uçmuş körpüdən avtomobillə keçmək istəyərkən çaya düşərək boğulan amerikalı kişinin ailəsi “Google Maps”in xəritələri yeniləmədiyini və bunun da həmin şəxsin ölümünə səbəb olduğunu iddia edib. 

2022-ci ilin sentyabrında Filip Pakson adlı şəxs Şimali Karolina ştatının Hikori şəhərində körpünü keçmək istəyib. Ancaq körpü zədələndiyi üçün o, çaya düşüb və həyatını itirib. Paksonun ailəsi, “Google”un onu doqquz il əvvəl çökən körpüyə istiqamətləndirdiyini deyib. Ailəsi onun ölümü ilə əlaqədar şirkəti məhkəməyə verib. Onların iddiasına görə, iki uşaq atası olan Pakson dostunun qızının ad günündən qayıdarkən tanımadığı məhəlləyə gedib. Lakin sözügedən körpünün sökülməsindən məlumatı olmayıb. “Google Maps” də bununla bağlı xəbərdarlıq etməyib.  “Google”dan başqa daha üç yerli şirkət də körpünün saxlanmasına cavabdeh olduqları əsas gətirilərək məhkəməyə verilib.

Paksonun həyat yoldaşı açıqlamasında, “Qızlarımız atalarının necə və niyə öldüyünü soruşduqda, onların başa düşə biləcəyi söz tapa bilmirəm. Çünki bir yetkin kimi GPS istiqamətlərinə və körpüyə cavabdeh olanların insan həyatına bu qədər az hörmətlə necə yanaşdıqlarını hələ də başa düşmürəm” - sözlərini söyləyib. 

Məsələ ilə bağlı “Google”dan da rəsmi açıqlama verilib. Şirkətin sözçüsü, “Biz Pakson ailəsinin ağrısını dərindən paylaşırıq. Məqsədimiz “Google Maps”da dəqiq naviqasiya məlumatı təqdim etməkdir və bu işi araşdırırıq" - ifadələrini işlədib. 

Ailənin vəkilləri isə məsələ ilə bağlı, sənədlərdə məhz “Google”u günahlandıraraq, "Təəssüf ki, qaranlıqda və yağışda ehtiyatla maşın sürərkən o, heç bir şübhə duymadan “Google”un qeyri-dəqiq göstərişlərinə əməl etdi və  yerli əhalinin “Heç bir yerə getməyən körpü” adlandırdığı istiqamətə yollandı və çaya düşərək boğularaq öldü” - sözlərini yazıb.

Elmir