Mənzillərdə yeni qaz sayğaclarının quraşdırılması prosesi aparılır. Lakin sakinlər quraşdırılan sayğaclardan narazılıq edir.

Valyuta.Az xəbər verir ki, mövzu ilə bağlı oxu.az-a Xəzər rayonu, Şüvəlan qəsəbəsində yaşayan sakinlərdən biri müraciət edib.

Vətəndaş bildirir ki, ötən gün quraşdırılan yeni smart-kart tipli sayğacların kartlarına ödəniş etmək olmur:

“Yeni sayğac quraşdırıldıqdan sonra kartı aktivləşdirməli olduğumuz bildirildi. Lakin mənimlə bərabər bir neçə vətəndaş da sayğacın kartına pul yükləyə bilmir. “Azəriqaz” İB-dən bizə dedilər ki, sistemdə problem yaranıb və gün ərzində həll olunacaq. Lakin günboyu məsələ öz həllini tapmadı. Bu gün də saat 10 radələrində sayğacın kartına pul yükləmək üçün “MilliÖn” terminallarına yaxınlaşdım. Yenidən eyni problem yaşandı. Dünəndən evdə istilik yoxdur”.

Məsələ ilə bağlı “Azəriqaz”a sorğu ünvanlanıb. 

Qurumun Mətbuat xidmətinin rəhbəri Ceyhun Səfərov Oxu.Az-ın sorğusuna cavab olaraq bildirib ki, sistemdə texniki problem olub:

“Sözügedən problem barədə məlumatımız var. Sistemdə kiçik texniki problem yaranmışdı. Hazırda həmin problem öz həllini tapıb. Vətəndaşlar sayğac kartlarına pul köçürə bilərlər”.