Dövlət Statistika Komitəsinin aylıq hesabatına əsasən, bu il ərzaq məhsulları 15 faiz bahalaşıb. 

2023-cü ilin yanvar-iyun aylarında istehlak qiymətləri indeksi 2022-ci ilin yanvar-iyun aylarına nisbətən 112,7 faiz, o cümlədən ərzaq məhsulları, içkilər və tütün məmulatları üzrə 115,1 faiz, qeyri-ərzaq məhsulları üzrə 111,4 faiz, əhaliyə göstərilmiş ödənişli xidmətlər üzrə 110,5 faiz təşkil edib.

Təkcə iyun ayında ərzaq məhsulları, içkilər və tütün məmulatları üzrə istehlak qiymətləri indeksi əvvəlki aya nisbətən 97,9 faiz, əvvəlki ilin iyun ayına nisbətən 111,5 faiz təşkil edib. 

Bəs bahalaşmanın səbəbləri nədir və artım davam edəcəkmi?

Valyuta.az məsələni İqtisadi və Sosial Araşdırmalara Yardım İctimai Birliyinin sədri Eyyub Kərimli ilə müzakirə edib. 

Eyyub Kərimli bildirib ki, 2022-ci ildə dünyada böyük infilyasiya və qiymət artımı bu ilə də təsir göstərib:

“Bizdə əsas qiymət artımı həm idxal infilyasiyası, mal və xidmətlərin qiymət artımı ilə əlaqədardır. Bu baxımdan da infilyasiya hələ davam edir”. 

İqtisadçı qeyd edib ki, Mərkəzi Bank tərəfindən bu rəqəm 8-9 faiz arasında proqnozlaşdırılır:

"Hətta prezident İlham Əliyev də çıxışı zamanı vurğulayıb ki, infilyasiya ilin sonunda bir rəqəmli ədədlərə düşməlidir".

Eyyub Kərimli vurğulayıb ki, bəzi məhsulların mövsümlə əlaqəli olaraq qiymət artımı müşahidə olunsa da, artıq qiymət artımı səngiyir:
 
“Bu, mövsümlə bağlı olaraq əsasən meyvə-tərəvəzin qiymətlərində ucuzlaşma müşahidə olunur. Hesab edirəm ki, növbəti aylarda qiymət artımı səngiyəcək, infilyasiya bir rəqəmli həddə düşəcək”. 

Ekspertin sözlərinə görə, bunun da müxtəlif səbəbləri var:

“Məsələn, dünyada artıq infilyasiya prosesləri səngiyir. Bildiyimiz kimi, ölkəmiz idxaldan asılıdır. Hazırda dünyada taxılın, bitki yağlarının qiymətində biz ucuzlaşma müşahidə edirik. Bu da dünya miqyasında da qiymət artımının qarşısını alır. Ona görə düşünürəm ki, bu prosesin həm də Azərbyacana təsiri olacaq. Növbəti aylarda qiymətlərin sabitləşməsini müşahidə edəcəyik”.

Davud