"FIM-CISL" həmkarlar ittifaqı İtaliyanın ötən il üzrə avtomobil istehsalı göstəricilərini açıqlayıb.  

Valyuta.Az xəbər verir ki, Avropa İttifaqının üçüncü ən böyük iqtisadiyyatında avtomobil istehsalı ötən il təxminən 46% azalaraq 283 min 9 vahidə düşüb. Bu, 1956-cı ildən bəri qeydə alınan ən aşağı səviyyədir. Kommersiya nəqliyyat vasitələrinin istehsalı da 17% azalaraq 192 minə enib.  

2021-ci ildə "Fiat Chrysler" və Fransanın "PSA-Peugeot" şirkətinin birləşməsi ilə yaradılan "Stellantis" şirkətinin İtaliyadakı avtomobil istehsalı keçən il təxminən 37% azalaraq 475 min 90 vahidə geriləyib. Halbuki şirkət 2023-cü ildə 751 min 384 avtomobil istehsal etmişdi.  

Həcminə görə dünyanın dördüncü ən böyük avtomobil istehsalçısı olan "Stellantis", Avropadakı digər avtomobil istehsalçıları kimi elektrikli nəqliyyat vasitələrinə zəif tələbat, tənzimləmə qeyri-müəyyənliyi və Çindən gələn ciddi rəqabətlə üzləşir.  

Həmkarlar ittifaqının açıqlamasında, “2024-cü il 'Stellantis'in qara ili kimi xatırlanacaq,” ifadəsi yer alıb.  

"FIM-CISL" prezidenti Ferdinando Uliano (Ferdinando Uliano), Avropa İttifaqına 2025-ci il üçün emissiya hədəflərini yenidən nəzərdən keçirmək çağırışı edərək, “Bu, Avropa üçün bir mübarizədir,” deyə bildirib.  

1 milyon istehsal hədəfi

İtaliyada "Fiat", "Maserati", "Alfa Romeo" və "Lancia" kimi markaları 5 zavodda istehsal edən "Stellantis", xəbər yayıma hazırlanarkən məsələyə dair heç bir açıqlama verməyib.  

"Stellantis" keçən ay istehsalı artırmaq üçün yeni bir plan təqdim edib. Şirkət, 2025-ci ildə İtaliyaya ümumilikdə 2 milyard avro sərmayə yatıracağını və yeni modellər istehsal edəcəyini açıqlayıb.  

Yeni modellərin bazara təqdim olunacağı təqdirdə istehsalda 2026-cı ildən etibarən artım gözlənilir.  

İtaliya hökuməti isə ölkədə avtomobil istehsalını bir milyon vahiddən yuxarı çıxarmağı hədəfləyir.

Rəhim