“Yeni nəsil kassaların tətbiqi effektiv nəticələr verir. Onların əhatə dairəsi genişləndikcə dövriyyələrin şəffaf bəyan edilməsi surətlənir”. 

Valyuta.az xəbər verir ki, Dövlət Vergi Xidmətinin rəisi vəzifəsini icra edən Orxan Nəzərli belə deyib. 

Onun sözlərinə görə, pərakəndə ticarət şəbəkəsində yeni nəsil onlayn kassa aparatlarının quraşdırılması ticarət dövriyyələrinin şəffaflaşmasına müsbət təsir edib: "Əgər 2020-ci ilin I rübündə marketlərdə onlayn kassa çekləri üzrə pərakəndə ticarət dövriyyəsinin orta aylıq həcmi 162 milyon manat təşkil edirdisə, II rübdə bu göstərici 192 milyon manat, III rübdə 209 milyon manat, IV rübdə isə 222 milyon manat təşkil edib". 

O.Nəzərəli qeyd edib ki, hazırda ticarət və ictimai iaşə obyektlərindən 23 mindən çox yeni nəsil onlayn kassa aparatı quraşdırılıb: “2022-ci ilin sonunadək bütün ölkədə istifadə edilən kassa aparatlarının onlayn kassalarla əvəz edilməsi nəzərdə tutulub. Bu kassaların tətbiqi nəticəsində pərakəndə ticarət və xidmət sektorunda baş verən istənilən ödənişin real vaxtda elektron sistemdə əks etdirilməsi pozuntulara yol verilməsinin, dövriyyələrin gizlədilməsinin qarşısını alır”.