Havaların isinməsi ilə birlikdə yay tətili planları da canlanmağa başlayır. Dəniz, dağlar, istirahət mərkəzləri və təbiət qoynunda sərinlik axtaranların sayı hər il artır. 

Bəs bu yay bizi nələr gözləyir? Yerli və xarici turistlər haraya üz tutacaq? 

Valyuta.az xəbər verir ki, mövzu ilə bağlı Ölkə.az-a danışan turizm eksperti Ceyhun Aşurov bildirib ki, yay ayları insanların ən çox səyahət, istirahət etdiyi bir dövrdür. 

Onun sözlərinə görə, bütün dünyada bu dövrdə tələbat artır, ölkəmizdə də yerli və xarici turistlərin aktivliyi gözlənilir:

“Hazırkı geosiyasi şəraitdə vəziyyətin əvvəlki illərlə müqayisədə bir qədər fərqli olması təbiidir. Çünki şimal ərazidə Rusiya-Ukrayna müharibəsi əlbəttə ki, bütün bu konyunkturaya təsir edir.

Bilirik ki, bu il turizmin Azərbaycan üçün bərpa dövrü olacaq. Çünki Azərbaycanda hələ göstəricilər tam 2019-cu il səviyyəsinə gəlməyib. 2019-cu ildə ölkəmizə ən çox əcnəbi turist təxminən 3,2 milyon gəlməyinə baxmayaraq, keçən il Azərbaycana 2,6 milyon əcnəbi gəlmişdi. Bu da onu göstərdi ki, hələ Azərbaycanda turizm bazarı tam bərpa olmamışdı. Baxmayaraq ki, 2024-cü il dünya turizm bazarı üçün bərpa dövrü sayılır, göstəricilər “Covid-19” pandemiyasından öncəki göstəricilərə yaxınlaşmışdı. Amma hələ ki, Azərbaycanda bu bərpa tam şəkildə olmayıb. Təbii ki, quru sərhədlər bağlıdır. Bu da öz təsirini göstərir”. 

Ekspert qeyd edib ki, qonşu ölkələrdən gələn turistlərin sayı əvvəlki illə müqayisədə azdır:

“Hansı ki, ən çox ölkəmizə məhz qonşu ölkələrdən - Gürcüstan, Rusiya, Türkiyə, İrandan gəlirdi. Mövcud vəziyyətə əsasən, bu, öz təsirini göstərməmiş deyil. Qiymətlərin keçən ildən o qədər də fərqli olmayacağını düşünürük. Çünki biz deməzdik ki, keçən illə müqayisədə qiymətlər artacaq. Amma ən çox istehlak olunan və turistlərin çox getdiyi regionlar Bakıya yaxın ərazilərdir. Paytaxtdan elə də uzaq olmayan və turizm infrastrukturu olan Qəbələ, Şəki, Şamaxı, Quba, Qusar və cənub regionlarını bura aid etmək olar”.