"OpenAI" şirkəti Cənubi Koreyada "ChatGPT" xidmətinə artan tələbat fonunda Seulda ilk ofisini açacağını bildirib.

Valyuta.az xəbər verir ki, "OpenAI"nin məlumatına əsasən, Cənubi Koreya Birləşmiş Ştatlardan sonra pullu "ChatGPT" abunəçilərinin sayına görə dünyada ikinci yerdədir.

Şirkət ölkə ilə tərəfdaşlıqları dəstəkləmək məqsədilə artıq işçilərin işə qəbuluna başladığını və bu istiqamətdə əlavə detalları yaxın aylarda açıqlayacağını bildirib.

"OpenAI"nin baş strategiya direktoru Ceyson Kvon bildirib ki, Koreyada həm çip istehsalı, həm də proqram təminatı sahəsində güclü imkanlar var. "Həm gənclər, həm də yaşlılar süni intellektdən istifadə etdiyinə görə, bu ölkə süni intellekt üçün dünyanın ən perspektivli bazarlarından biridir", - deyə o bildirib.

Xatırladaq ki, bu ilin əvvəlində "OpenAI" Cənubi Koreyanın məşhur mesajlaşma platforması operatoru olan "Kakao" ilə birgə süni intellekt məhsulları hazırlayacağını açıqlamışdı.

Sərvanə Rəmixanova