Danimarka ölkə parlamentinin 2040-cı ilə qədər pensiya yaşını 70-ə qaldıran qanunu qəbul etməsindən sonra Avropada ən yüksək pensiya yaşına malik ölkə olub.

Valyuta.az xəbər verir ki, bu barədə “BBC News” telekanalı məlumat yayıb.

Belə ki, 2006-cı ildən Danimarka rəsmi pensiya yaşını gözlənilən ömür uzunluğu ilə əlaqələndirir və hər beş ildən bir ona yenidən baxır. Hazırda Danimarkada pensiya yaşı 67-dir.

Lakin 2030-cu ildə bu rəqəm 68, 2035-ci ildə isə 69 olacaq. 70 pensiya yaşı isə 1970-ci il dekabrın 31-dən sonra doğulan bütün şəxslərə şamil ediləcək. Yeni qanun cümə axşamı lehinə 81, əleyhinə isə 21 səslə qəbul edilib.

Bununla belə, keçən il Danimarkanın Baş naziri Mette Frederiksen sürüşmə şkalası prinsipinə yenidən baxılacağını istisna etməyib.

Ümumilikdə isə Avropada pensiya yaşları fərqlidir. Belə ki, son illər bir çox hökumətlər gözlənilən ömür müddətini nəzərə almaq və büdcə kəsirlərini aradan qaldırmaq üçün pensiya yaşını artırır.

Məsələn, İsveçdə insanlar pensiya ödənişlərini 63 yaşından almağa başlaya bilərlər. İtaliyada standart pensiya yaşı 67-dir, baxmayaraq ki, Danimarkada olduğu kimi burada da pensiya yaşı ömür uzunluğuna görə tənzimlənə və ya 2026-cı ildən başlayaraq, arta bilər.

Böyük Britaniyada 6 oktyabr 1954-cü il və 5 aprel 1960-cı il tarixləri arasında anadan olanlar pensiyalarını 66 yaşında almağa başlayırlar. Lakin həmin tarixdən sonra doğulanlar üçün dövlət pensiya yaşını tədricən artıracaq.

Fransada isə 2023-cü ildə pensiya yaşını 62-dən 64-ə qaldıran qanun qəbul edilib. Son dərəcə qeyri-populyar dəyişiklik etirazlara və iğtişaşlara səbəb olub və Franda Prezidenti Emmanuel Makron bu qanunu səsvermə olmadan parlamentdən keçirməyə məcbur olub.

Yeniavaz.com©