ABŞ prezidenti Donald Trampın rəhbərlik etdiyi administrasiya Harvard Universitetinin əcnəbi tələbələri qəbul etmə hüququnu ləğv etdiyini açıqlayıb.

Valyuta.az xəbər verir ki, bu addım administrasiyanın elit ali təhsil müəssisələrinə təzyiq göstərmək cəhdlərinin ciddi şəkildə genişlənməsi kimi qiymətləndirilir.

ABŞ Daxili Təhlükəsizlik Nazirliyi son günlərdə Harvard Universitetinə rəsmi şəkildə bildiriş göndərərək, tələbə və mübadilə proqramları üzrə sertifikatlaşdırmanın dərhal ləğv olunduğunu bildirib. Nazir Kristi Noem tərəfindən imzalanan məktubda qeyd olunub ki, bu qərar həm mövcud, həm də gələcək əcnəbi tələbələrə şamil olunur. Nazirlik əlavə edib ki, "Harvard bundan sonra xarici tələbələri qəbul edə bilməz, mövcud əcnəbi tələbələr isə ya universiteti tərk etməli, ya da hüquqi statuslarını itirəcəklər".

Hazırda Harvard Universitetində təxminən 6 800 əcnəbi tələbə təhsil alır ki, bu da ümumi tələbə sayının təqribən 27 faizini təşkil edir. Əcnəbi tələbələrin ödənişləri universitetin maliyyə mənbələri üçün mühüm əhəmiyyət kəsb edir – təhsil haqqı illik 59 320 dollar, yaşayış və digər xərclərlə birlikdə isə 87 000 dollara qədər yüksəlir.

Universitetin mətbuat katibi Ceyson Nyuton açıqlamasında qərarı "qanunsuz" adlandırıb və bildirib ki, Harvard 140-dan çox ölkədən gəlmiş tələbə və alimlərin universitetə və ölkəyə verdiyi töhfələri yüksək qiymətləndirir. O deyib: "Bu cəza xarakterli addım Harvard icmasına və ölkəmizə ciddi zərər vurmaqla yanaşı, universitetin elmi və tədqiqat missiyasını da zəiflədir."

Qeyd edək ki, bu qərar ABŞ Daxili Təhlükəsizlik Nazirliyinin Harvarddan tələb etdiyi genişmiqyaslı sənəd sorğusu ilə bağlı yaranmış hüquqi mübahisələrdən sonra verilib. Universitet administrasiyanın bu addımına qarşı ikinci dəfə məhkəmə iddiası qaldırmağa hazırlaşır.

Mütəxəssislər bu qərarı presedentsiz hesab edir və bildirirlər ki, indiyədək heç bir administrasiya bu səviyyədə universitetin tələbə qəbuluna müdaxilə etməyə çalışmayıb.

Sərvanə Rəmixanova