Böyük Britaniyanın Azərbaycanda qızıl, gümüş və mis hasil edən şirkəti “Anglo Asian Mining PLC” 2024-cü ili 39,6 milyon ABŞ dolları məbləğində gəlirlə başa vurub. 

Valyuta.az xəbər verir ki, mədən şirkətinin gəlirləri ötən ilin eyni dövrü ilə müqayisədə 14% və 6,3 milyon dollar azalıb. Qeyd edək ki, gəlirlərdəki azalma əsasən qızıl hasilatının azalması və emal proseslərinin müvəqqəti dayandırılması ilə bağlıdır. 

Şirkət bildirib ki, Gedəbəy və Qadir mədənləri istismar müddətinin son mərhələsində olduğundan, filiz tərkibindəki qızıl səviyyəsi də aşağı olub. Bu da ümumi hasilata təsir göstərib.
Bununla belə, şirkət xərclərə ciddi nəzarət və əvvəlki ildə qeydə alınan dəyərsizləşmələrin olmaması sayəsində maliyyə nəticələrində müsbət dinamika əldə edib. Vergiyə qədər zərər 2023-cü ildəki 32 milyon dollardan 21,3 milyon dollara enib. Əməliyyat zərəri isə 24,8 milyon dollardan 18,8 milyon dollara qədər azalıb.

Şirkətin xalis borcu (icarə öhdəlikləri istisna olmaqla) 2024-cü ilin sonunda 14,7 milyon dollar təşkil edib ki, bu da 2023-cü ilin sonuna olan göstəricidən 4,4 milyon dollar çoxdur. “Anglo Asian” bu nəticəni işçi kapital və xərclərə nəzarət siyasəti ilə izah edir.
Əməliyyat üzrə pul axını isə işçi kapital dəyişikliklərindən əvvəl 6,6 milyon dollar olub (2023: 1,0 milyon dollar).

Şirkət 2025-ci ildə Gilar və Demirli kimi yeni mədənlərin hasilata başlaması ilə maliyyə göstəricilərinin əhəmiyyətli dərəcədə yaxşılaşacağını gözləyir.

Xatırladaq ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51%, “Anglo-Asian Mining Plc.” şirkətinin payı 49% təşkil edir. Şirkətin icraçı direktoru Rza Vəziridir.

Nara