Bəzi insanlar iş tapmaq və əmək fəaliyyətinə başlamaq üçün müxtəlif şirkətlərə CV göndərir, lakin çox zaman bu müraciətlər cavabsız qalır. Belə şəxslər iş tapmaqda ciddi çətinliklərlə üzləşirlər. Digər tərəfdən, elə insanlar da var ki, heç bir yerə CV göndərmədən iş görüşmələrinə dəvət alır və işlə təmin olunurlar. Bu fərq təsadüfi deyil və müəyyən yanaşmaların nəticəsidir. Bəs heç yerə CV göndərmədən iş təklifləri alan kadr olmaq üçün nələri bilməli, hansı addımları atmalıyıq?

İnsan Resursları üzrə mütəxəssis Asim Həsənov Valyuta.az-a bildirdi ki, işin sizi tapması üçün müxtəlif yollar mövcuddur. Birincisi, şəxsi brendinizi yaratmalısınız. Bunun üçün sosial şəbəkələr kifayət edir. Çünki müasir dövrdə “Linkedin”, “Telegram”, “İnstagram”, kimi platformalarda paylaşımlar etmək, istifadə etmək, müəyyən icmalara qatılmaq və.s hamısı ödənişsizdir. Şəxsi brendinizi yaradanda digərləri sizi daha rahat görə bilir. Bu da iş axtarmağımızı asanlaşdırır. Mütləq deyil ki, hər gün paylaşımlar edəsiniz, dəyərli məlumatlar paylaşmaq daha önəmlidir. Hansı sahəyə yönəlmisinizsə, onunla bağlı paylaşımlar etməyiniz daha effektiv ola bilər. Məsələn, HR mütəxəssisi qanunvericilik, insan psixologiyası və.s barədə paylaşımlar edərək, diqqət cəlb edə bilər. Belə etdikdə işə götürən tərəfdə bu rəy formalaşır ki, siz seçdiyiniz sahə üzrə üstün biliklərə sahibsiniz”.

Ən qədim üsul şəbəkələşmədir

A.Həsənov düşünür ki, CV atmadan da iş tapmaq üçün qurulan əlaqələr, şəbəkələşmə önəmlidir: “Əgər hər hansı şirkətdə vakansiya açılmamışdan qabaq sizə bildirsələr, bu, o deməkdir şirkətin əlindəki 3-5 CV-dən biri də sizə məxsusdur və siz də namizədlərdən avtomatik olaraq irəli çıxırsınız. Ona görə də çalışmaq lazımdır ki, müxtəlif yarmarkalarda, tədbirlərdə, şirkətlərin müxtəlif iclaslarında iştirak edəsiniz. İşləmək istədiyiniz sahəyə uyğun adamlarla ünsiyyətiniz olmalıdır. Yəni, gələcəkdə qarşılaşacağınız, iştirak edəcəyiniz müsahibələr xoş ünsiyyətli və daha rahat keçəcək. Çünki sizi tanımış olacaqlar”. 

Sərvanə Rəmixanova