Yeni biznes qurmaq həyəcanverici bir proses olsa da, ciddi çətinliklərlə də müşayiət olunur. İlk mərhələdə bir çox qərarlar qəbul edilməli, müxtəlif sahələrə vəsait ayrılmalı və işin idarəsi üçün düzgün plan qurulmalıdır. Bu səbəbdən biznesin ilk altı ayı gələcək inkişaf üçün həlledici dövr sayılır. Biznesin ilk 6 ayında - bu həlledici dövrdə nələrə diqqət edilməlidir? 

ABŞ-də kiçik bizneslərə dəstək verən maliyyə mütəxəssisi, SMB Compass şirkətinin rəhbəri Matthew Gillman, startap sahiblərinin bu dövrdə diqqət yetirməli olduğu əsas məqamları açıqlayıb:

Valyuta.az kiçik biznes quranların ilk 6 ayda əməl etməli olduğu qaydaları təqdim edir.

1. Bazar araşdırmasını davam etdirin

İşə başlasanız belə, bazar araşdırması dayandırılmamalıdır. Müştəri davranışları və bazar tələbləri dəyişir. Daim yenilikləri izləmək, yeni imkanları vaxtında görmək və hədəf auditoriyanı dəqiq təyin etmək vacibdir.

2. Əsas komandanı formalaşdırın

Yeni sahibkarlar çox zaman hər işi tək görməyə çalışırlar. Amma bu, uzunmüddətli inkişaf üçün risklidir. Uğurlu başlanğıc üçün aşağıdakı əsas vəzifələr üzrə şəxslər seçilməlidir:

Əməliyyatlar üzrə rəhbər (COO)
Maliyyə üzrə rəhbər (CFO)
Məhsul meneceri
Marketinq meneceri
Müştəri dəstək heyəti
Satış meneceri
Bu komanda sahibkara daha strateji məsələlərə fokuslanmaq imkanı verir.

3. Biznes planınızı daim əlinizdə saxlayın

Biznes planı yalnız ilkin mərhələdə deyil, davamlı inkişaf üçün də əsas sənəddir. Həm strateji hədəfləri müəyyənləşdirir, həm də maliyyə dəstəyi almaqda kömək edir. Kredit verən qurumlar da biznes planının mövcudluğuna xüsusi önəm verir.

4. Sosial şəbəkələrdə aktiv olun

Sosial media platformaları və veb saytlar vasitəsilə brendinizi tanıdın. “Google”, “İnstagram”, “Facebook” və “TikTok” kimi platformalarda aktiv olmaq, müştəri kütləsinə daha tez çatmaq imkanı yaradır.

2025-ci ilə qədər mobil ticarətin ABŞ-da pərakəndə satışların 44%-ni təşkil edəcəyi deyilirdi. Bu fikir təsdiqini tapdı və bu səbəbdən rəqəmsal mühitdə aktiv olmaq artıq seçim deyil, zərurətdir.

5. Dost və ailədən rəy alın

Əgər müştəri rəyiniz yoxdursa, yaxın çevrənizdən dürüst fikirlər toplayın. Onların sosial şəbəkələrdə paylaşacağı fikirlər və videolar, brendinizin tanınmasında mühüm rol oynaya bilər.

6. Şəbəkə qurun, aktiv olun

Yeni tərəfdaşlar, məsləhətçilər və investorlarla tanış olmaq üçün tədbirlərdə iştirak edin. Əgər açıq görüşlərdə iştirak etməkdə çətinlik çəkirsinizsə, onlayn biznes icmalarına qoşulun.
İlk altı ay uğurun bünövrəsini qoyan dövrdür. Əgər düzgün planlaşdırma və fokuslanma olsa, bu dövr həm faydalı, həm də gəlirli ola bilər. Çətinliklər zamanı geri dönüb biznes planınıza baxın, o sizə istiqamət verəcək.

Sərvanə Rəmixanova