Databricks "Neon" startapını 1 milyard dollara satın alır.

Valyuta.az xəbər verir ki, məlumat analitikası sahəsində fəaliyyət göstərən “Databricks” şirkəti bulud əsaslı verilənlər bazası proqram təminatı təqdim edən “Neon” startapını təxminən 1 milyard ABŞ dolları müqabilində satın aldığını elan edib.

Bu, “Databricks”in son illərdə həyata keçirdiyi iri alqı-satqı əməliyyatlarının davamıdır. Şirkət 2023-cü ildə süni intellekt modellərinin təlimi ilə məşğul olan “MosaicML” startapını 1,3 milyard dollara, ötən il isə məlumat optimizasiyası sahəsində çalışan “Tabular” şirkətini 1 milyard dollardan artıq məbləğə əldə edib.

“Databricks”in yaydığı məlumata görə, “Neon”un 18 mindən çox müştərisi var. Onlar arasında “OpenAI”, “Adobe”, “Boston Consulting Group”, “Replit” və “Vercel” kimi böyük adlar yer alır.
“Neon”un təqdim etdiyi proqram təminatı açıq mənbəlidir və “Amazon Web Services”in “Aurora Postgres” xidmətinə alternativ kimi tanıdılır. Bu platforma, “PostgreSQL” verilənlər bazasına əsaslanır və proqramçılar arasında sürətlə populyarlıq qazanır. Məşhur “vibe coding” layihələri ilə tanınan “Supabase” kimi digər startaplar da eyni bazaya əsaslanır.

Bulud nəhəngləri “Google” və “Microsoft” da “PostgreSQL” xidmətləri təqdim edir. “Databricks” isə məlumatların təmizlənməsi, sorğuların icrası və süni intellekt modellərinin işlədilməsi üçün proqram təminatı satır.

Maraqlıdır ki, “Neon” startapına “Databricks”lə yanaşı “Microsoft” və “Snowflake” də sərmayə yatırıb. Şirkətin təsisçisi və baş direktoru “Meta” və “Microsoft”un keçmiş mühəndisi Nikita Şamqunovdur. O, “Meta”dan ayrıldıqdan sonra “SingleStore” (əvvəlki adı ilə “MemSQL”) adlı digər verilənlər bazası startapını da idarə edib.

“Databricks”in həmtəsisçisi və baş direktoru Ali Qodsi “Neon”un texnologiyasını yüksək qiymətləndirərək bildirib ki, bu platforma hesablama və yaddaş infrastrukturunu bir-birindən ayırdığı üçün daha səmərəlidir və iqtisadi cəhətdən sərfəlidir.

“Neon”un gəlir modeli müştərinin istifadə etdiyi hesablama və yaddaş həcminə görə aylıq ödəniş əsasında qurulub. Platforma hazırda “Amazon” və “Microsoft Azure” buludlarında fəaliyyət göstərir.

Qeyd edək ki, 2021-ci ildə təsis edilmiş “Neon” 130-dan çox əməkdaşa malikdir və tam paylanmış formatda fəaliyyət göstərir.

“Databricks”in qərargahı San-Fransiskoda yerləşir. Şirkət 2013-cü ildə yaradılıb və 2024-cü ilin dekabrında 10 milyard dollarlıq investisiya ilə 62 milyard dollar dəyərində qiymətləndirilib. Bu maliyyələşmənin bir hissəsi də məhz satınalmalara yönəldilib.

Sərvanə Rəmixanova