"Əvvəlki illərin təcrübəsi göstərir ki, heç də hər il büdcə xərcləmələri proqnoz edildiyi səviyyədə olmur”. 

Qaynarinfo-ya açıqlamasında bunu neft-qaz məsələləri üzrə ekspert İlham Şaban dünya bazarında neftin qiymətinin enməsinin Azərbaycan iqtisadiyyatına təsiri və büdcənin necə nizamlanacağı sualına cavabında deyib: 

"Aprelin 2-dən başlayaraq neftin qiyməti azalır. Bir həftə keçsə də, bununla bağlı nə ARDNŞ, nə maliyyə, nə energetika nazirliyi, nə də ümumən hökumət özünün hansısa təşvişi yönündə açıqlama verir. O baxımdan ola bilsin açıqlama bir qədər sonra olsun. Yaxud da bazarlarda vəziyyətin stabilləşməsini gözləyirlər. Enmə ilə əlaqədar bazarda böyük təlatümlər yaşansa da, proses davamlı deyil. Dünən axşamdan başlayaraq neftin qiyməti artmağa başlayıb, bu gün artıq 65 dollardır. Bu da Trampın 75 ölkə üçün tətbiq etdiyi gömrük rüsumlarını 90 gün müddətində dayandırmasının nəticəsidir. Yəni bazar bunu pozitiv qəbul etdi”. 

Ekspert deyir ki, bundan sonra bazardakı prosesin necə olacağı gələn pozitiv və neqativ informasiyalardan hansının daha çox olması ilə əlaqədar olacaq:

"Neftin qiymətinin düşməsinin Azərbaycan iqtisadiyyatına təsirinə gəldikdə, ümumi tendensiya odur ki, cari ildə neftin qiyməti ötən ildəkinə nisbətdə xeyli aşağı olacaq. Onun nə qədər olacağı, büdcədə götürülən 70 dollardan nə qədər aşağı enəcəyi təqdirdə, hökumətin addımının necə olacağı isə artıq onun öz açıqlamasından məlum olacaq. Ola bilsin, neftin qiyməti 65 dollar olsun və hökumət heç bir korrektlərə getməsin. Amma ola da bilər hansısa xərcləri azaltmaq hesabına azalan gəlirləri kompensasiya etsin. Əvvəlki illərin təcrübəsi göstərir ki, heç də hər il büdcə xərcləmələri proqnoz edildiyi səviyyədə olmur”. 

Qeyd edək ki, son bir həftədə dünya bazarında neftin qiyməti aşağı düşməkdə davam edir. Hazırda brent markalı neftin qiyməti 65 dollardır. Azərbaycan neftinin qiyməti də 66-67 dollar civarındadır. Səbəb ABŞ Prezidenti Trampın tətbiq etdiyi gömrük rüsumları ilə bağlıdır. Lakin ardınca Tramp əksər ölkələr üçün resum tətbiqinə 90 günlük moratorium da qoyub. Hər halda neftin qiyməti aşağı enməkdədir.