"Azərişıq" ASC işğaldan azad olunmuş ərazilərdə elektrik enerjisi ilə təchizatın genişləndirilməsi məqsədilə ümumi dəyəri 13 milyon 941 min 643 manat olan yeni infrastruktur layihələrini gündəmə gətirib.

"Valyuta.az" xəbər verir ki, bu çərçivədə Ağdam rayonunun Güllücə, Nəmirli, Tağıbəyli, Qərvənd və Salahlı Kəngərli kəndlərini əhatə edən ərazilərdə 35 kV-luq yeni iki dövrəli ÖİN (SİP-3) elektrik verilişi xəttinin inşası nəzərdə tutulur. Sözügedən layihə üzrə təxmini maliyyə dəyəri 9 milyon 563 min 540 manat təşkil edir.

Digər bir təşəbbüs isə "Ağdərə" və "Suqovuşan" yarımstansiyalarını birləşdirəcək 35 kV-luq iki dövrəli ÖİN (SİP-3) elektrik xəttinin çəkilişini əhatə edir. Bu layihənin planlaşdırılan büdcəsi 4 milyon 378 min 102 manat müəyyən olunub.

Hər iki layihə üzrə sənəd qəbulu müddəti 2025-ci il mayın 12-dək davam edəcək.

Qeyd edək ki, "Azərişıq" ASC daha öncə Kəlbəcər şəhəri (1-ci faza) üzrə transformator məntəqəsinin tikintisi və 35 kV-luq elektrik xəttinin çəkilməsi üçün 2 milyon 430 min 750 manatlıq maliyyə çərçivəsində yeni bir layihəyə də start verib. Bu istiqamətdə sənədlərin qəbul müddəti də mayın 12-si tarixində başa çatacaq. 

Sərvanə Rəmixanova