ABŞ-ın aviasiya nəhəngi “Boeing” şirkəti Çin müştərilərinin artıq istehsal olunmuş təyyarələri qəbul etməməsi səbəbilə bu ölkəyə təyyarə istehsalını dayandıra biləcəyi barədə xəbərdarlıq edib. 

Valyuta.az xəbər verir ki, bu barədə “Boeing”in rəhbəri "Kelli Ortberq" CNBC telekanalına verdiyi müsahibə və analitiklərlə keçirdiyi videokonfrans zamanı bəyan edib.

Ortberqin sözlərinə görə, Çin təyyarələrin təhvil verilməsi ilə bağlı problemlərin yaşandığı yeganə regiondur: "Bütün bu vəziyyət gömrük rüsumlarına görə yaranıb. Çinli müştərilərimizin çoxu açıq şəkildə bildirdi ki, artıq sifarişləri qəbul etməyəcəklər".

Hazırda Çin ABŞ-a artıq iki “Boeing” təyyarəsini geri qaytarıb və üçüncü təyyarənin də qaytarılması gözlənilir. Əlavə olaraq, getdikcə dərinləşən ticarət müharibəsi fonunda Çin ümumilikdə 50 ədəd təyyarədən ibarət sifarişin qalan hissəsindən də imtina edə bilər.

Ortberq bildirib ki, “Boeing” artıq istehsal olunmuş və montaj prosesində olan təyyarələri digər bazarlara yönəltmək üçün aktiv şəkildə yenidən bazar araşdırması aparır. Hələ istehsalına başlanılmamış, lakin Çin tərəfindən sifariş olunmuş doqquz təyyarə üçün isə yeni müştərilər axtarılır.

“Bu, əlbəttə ki, xoşagəlməz vəziyyətdir, lakin qısa müddətdə təyyarə almaq istəyən bir çox müştərimiz var. Buna görə də biz təchizatları sabit tələbatın olduğu istiqamətlərə yönəltməyə çalışacağıq. Biz sifarişləri qəbul etməyənlər üçün təyyarə istehsalını davam etdirmək niyyətində deyilik”, deyə Ortberq vurğulayıb. 

O əlavə edib ki, “Boeing” şirkəti bu vəziyyətin istehsalat prosesinə mənfi təsir göstərməməsi üçün əlindən gələni edəcək.

Xatırladaq ki, “Boeing” keçən il “737 MAX 9” model təyyarəsində baş verən hadisədən sonra etibar bərpa etməyə çalışır. Həmin insident zamanı uçuş zamanı təyyarənin fövqəladə çıxış lyukunun qapağı qopmuşdu. Şirkət bu yaxınlarda 31 milyon dollar zərər və 18 faiz artımla 19,5 milyard dollara çatan gəlirini açıqlayıb.

Paşa Məmmədli