Adı Avropa Yenidənqurma və İnkişaf Bankının (EBRD) Azərbaycandakı nümayəndəliyinə saxta sənədlər təqdim edərək külli miqdarda kredit götürməkdə hallanan "Gemza Group" MMC-nin dövlət qarşısında vergi borcu yaranıb.

Valyuta.az xəbər verir ki, şirkətin vergi borcunun məbləği hazırda 56 633,27 manat təşkil edir.

Eyni zamanda, şirkətin nizamnamə kapitalında da dəyişiklik edilib. Təsisçi Zamin Əliyev tərəfindən əlavə maliyyə yatırımı hesabına nizamnamə kapitalı 400 manata qədər artırılıb. Qeyd edək ki, 2012-ci ildən fəaliyyət göstərən "Gemza Group" MMC-nin əvvəlki nizamnamə kapitalı cəmi 40 manat idi.

Baxmayaraq ki, şirkətin nizamnamə kapitalı olduqca aşağıdır, onun fəaliyyət sahələri kifayət qədər genişdir. Keçən ilin sonlarında "Gemza Group" neft-qaz sektoruna xüsusi kimyəvi maddələrin tədarükü ilə məşğul olan "Novochem-Azerbaijan" şirkətini satın alıb. Şirkət mühəndislik, satınalma və təmir xidmətləri göstərir, eyni zamanda, Türkiyə, Birləşmiş Ərəb Əmirlikləri və Orta Asiya bazarlarında müştərilərlə əməkdaşlıq edir.

Xatırladaq ki, 2021 və 2022-ci illərdə Avropa Yenidənqurma və İnkişaf Bankı (EBRD) tərəfindən "Gemza Group" MMC-yə 13,6 milyon avroya qədər yüksək təminatlı kredit ayrılıb. Lakin 2023-cü ilin may ayında Baş Prokurorluq tərəfindən yayılan məlumata əsasən, EBRD-nin Azərbaycandakı nümayəndəliyinə saxta sənədlər təqdim edərək böyük məbləğdə kredit alınması faktı araşdırılıb.

Aparılan istintaq zamanı "Gemza Group" MMC-nin də adı saxtakarlıqda şübhəli bilinən şirkətlər sırasında çəkilib. Şirkətə qarşı Azərbaycan Respublikasının Cinayət Məcəlləsinin 195.2, 308.2, 320.1 və 320.2-ci maddələri ilə cinayət işi açılıb. Bu maddələr qanunsuz kredit alma, vəzifə səlahiyyətlərindən sui-istifadə və rəsmi sənədlərin saxtalaşdırılması kimi ciddi hüquqi pozuntuları əhatə edir.

Maya Hüseynova