Cari ilin yanvar-mart aylarında toxuculuq sənayesi, geyim, dəri və dəridən məmulatların, ayaqqabıların istehsalı sahələrində 143,8 milyon manat dəyərində məhsul istehsal edilib. 

Valyuta.az xəbər verir ki, bu ötən ilin eyni dövrü ilə müqayisədə 15,8% çoxdur.

Bu sahədə ən böyük pay 116,8 milyon manat ilə toxuculuq sənayesinin, ən az pay isə 5,2 milyon manat ilə dəri və dəridən məmulatların, ayaqqabıların istehsalında olub.

Məlumata əsasən, əvvəlki ilin müvafiq dövrü ilə müqayisədə dəri və dəridən məmulatların, ayaqqabıların istehsalında 23,7%, toxuculuq sənayesində 15,6% artım,geyim istehsalında isə 45,3% azalma qeydə alınıb.

Belə ki, toxuculuq məhsullarından pambıq mahlıcı istehsalında 37,48%, pambıq parçaların istehsalında 7,6%, pambıq yataq ağları istehsalında 2,7 dəfə artım olub. Pambıq ipliyi istehsalında 15,83%, xalça və xalça məmulatların istehsalında isə 12,5% azalma baş verib. 

Geyim istehsalında üst geyim istehsalı 43%, alt geyim istehsalı 4,22 dəfə artdığı halda, istehsalat və peşə komplektləri istehsalında 49,8 %, corab məmulatlarının istehsalında 44,7%, sair geyimlərin istehsalında isə 15,87% azalma müşahidə olunub.

Dəri və dəridən məmulatların istehsalında isə artım qeydə alınıb.

Belə ki, emal edilmiş dəri istehsalı 8,8 dəfə, ayaqqabı istehsalı isə 50,7% artıb.