"TikTok" "Instagram"ın analoqu olan "TikTok Notes"un bağlanacağını elan edib.

"TikTok" foto mübadiləsi üçün nəzərdə tutulan "TikTok Notes" tətbiqini bağlayacağını açıqlayıb. 

Valyuta.az xəbər verir ki, "TechCrunch" portalının məlumatına görə, platforma 8 may tarixindən etibarən fəaliyyətini dayandıracaq.

"Instagram"a bənzər bu sosial şəbəkə 2023-cü ilin aprel ayında Kanada, Avstraliya və Vyetnamda test rejimində istifadəyə verilmişdi. "TikTok Notes"un bağlanmasının səbəbləri barədə rəsmi açıqlama verilməsə də, ekspertlər xidmətin istifadəçilər arasında kifayət qədər populyarlıq qazana bilmədiyini ehtimal edirlər.

İndi "TikTok"un ana şirkəti "ByteDance" əsas diqqətini "Lemon8" tətbiqinin inkişafına yönəldib. 2024-cü ilin dekabr ayına olan məlumata görə, bu platformanın aylıq aktiv istifadəçi sayı 12,5 milyon olub. "TikTok" istifadəçilərə "TikTok Notes"dakı məlumatlarını saxlamağı və "Lemon8"dən istifadə etməyə başlamağı tövsiyə edir. Şirkət nümayəndələrinin sözlərinə görə, "Lemon8" "TikTok Notes" ilə müqayisədə daha geniş və funksional imkanlar təqdim edir.

"Lemon8" ilk dəfə 2020-ci ildə Yaponiyada istifadəyə verilib, daha sonra ABŞ və Cənub-Şərqi Asiya ölkələrində də əlçatan olub. Bu tətbiq "Instagram" və "Pinterest" elementlərini birləşdirərək, istifadəçilərə slayd-şou və şəkil seriyaları paylaşmaq, eyni zamanda məzmunu lent formatında izləmək imkanı yaradır. Lemon8-in imkanlarına kreativ alətlər, filtrlər, effektlər, stikerlər və mətn şablonları daxildir.

"TikTok Notes"un əvəzlənməsi ilə yanaşı, "ByteDance" "Lemon8"i ABŞ-da "TikTok"un mümkün qadağası fonunda alternativ platforma kimi təqdim etməyə çalışır. 2023-cü ilin noyabr ayında istifadəçilərə "Lemon8"ə birbaşa "TikTok" hesabları vasitəsilə giriş imkanı, həmçinin iki tətbiq arasında məzmun paylaşmaq funksiyası təklif olunmuşdu.

Paşa Məmmədli