Çinli avtomobil istehsalçısı "BYD", demək olar ki, benzinli avtomobilin yanacaq doldurma müddəti qədər tez şarj ola bilən yeni elektrikli nəqliyyat vasitələrini təqdim etdikdən sonra səhmlərində kəskin artım yaşayıb.  

Valyuta.Az xəbər verir ki, "BYD"nin səhmləri çərşənbə axşamı Honq Konq birjasında ticarət əməliyyatlarının açılması ilə 6%-ə qədər yüksəlib və şirkətin bazar dəyəri təxminən 162 milyard dollara çatıb. Bu göstərici "Ford", "General Motors" və "Volkswagen" şirkətlərinin ümumi bazar dəyərini geridə qoyub.  

Şirkətin prezidenti və qurucusu Vanq Çuanfu bazar ertəsi verdiyi açıqlamada "BYD"nin yeni batareya və şarj sisteminin testlər zamanı "Han L" sedan modeli üçün cəmi 5 dəqiqə ərzində təxminən 400 kilometr (249 mil) yürüş məsafəsi təmin edə bildiyini söyləyib. Yeni texnologiyaya malik avtomobillərin satışına gələn ay başlanacaq.  

Elektrikli avtomobillərin, daxili yanma mühərrikli nəqliyyat vasitələrinin yanacaqdoldurma məntəqəsinə girib-çıxması qədər qısa müddətdə şarj edilə bilməsi, uzun şarj müddəti səbəbindən bu nəqliyyat vasitələrinə ehtiyatla yanaşan sürücüləri inandıra bilər.  

Çin avtomobil sənayesi üzrə ekspert Yucin Hsyao qeyddə bildirib: "BYD" artıq qiymət rəqabəti, avtomobil dizaynı və ya yeni seqmentlərə girişdən daha çox, öz miqyasını və əsas elektrikli avtomobil texnologiyalarını istifadə edərək son dərəcə rəqabətli bazarda fərqlənməyin yollarını axtarır.

Rəhim