Biznes mühiti və beynəlxalq reytinqlər üzrə Komissiyanın Kommunal xidmətlərlə bağlı Vahid İnformasiya Sisteminin yaradılması və aidiyyəti sistemlərin inteqrasiyası üzrə 2025-ci il üçün Yol Xəritəsinə görə bu ilin may ayına qədər Azərbaycanda kommunal qurumlar üzrə vahid abunəçi kodu mexanizminin yaradılması nəzərdə tutulur.

Bu sistemin əsas üstünlükləri və mümkün çətinlikləri nələr ola bilər?

Mövzu ilə bağlı Valyuta.az-a danışan iqtisadçı Xalid Kərimli bildirib ki, bu yeni sistem vətəndaşlar üçün göstərilən xidmətlərin təkmilləşməsi baxımından üstünlük yaratmış olacaq:

“Vətəndaşlar rahat olacaq. Belə ki, bu sistemin tətbiqi ilə ödənişdə sadəlik və rahatlıq, vaxta qənaət, şəffaflıq, borca nəzarət mümkün olacaq. Onlar bir kodu ödəniş sisteminə daxil etməklə, işığa, qaza, suya nə qədər borcu olduğunu asanlıqla görə biləcək. Bundan başqa problem yarananda vahid kod vasitəsilə bütün xidmətlər üzrə şikayət və sorğuları mərkəzləşdirilmiş qaydada göndərmək mümkün olacaq”. 

Sistemin mümkün çətinlikləri haqqında da danışan ekspert bildirib ki, bu mexanizmin tətbiqində mümkün ola biləcək bir neçə əsas çətinliklər ola bilər:

“Texniki və İT infrastruktur çətinlikləri yarana bilər. Belə ki, məlumat bazalarının inteqrasiyası, məlumat təhlükəsizliyi və şəxsi məlumatların qorunması, texniki avadanlıqların və proqram təminatının yenilənməsi ilə bağlı müəyyən problemlər yara bilər. Bundan başqa normativ-hüquqi və qanunvericilik məsələləri, idarəetmə və koordinasiya problemləri ortaya çıxa bilər. Amma bütün hallarda bu sistem vətəndaşların rahatlığı üçün yaxşıdır”.

Davud