“Elva İnşaat Turizm Gida İhracat İthalat Sanayi və Ticaret Limited” Şirkətinin Azәrbaycan Respublikasındakı Filialının rəhbərinin ölkədən çıxışına məhdudiyyət qoyulub.

Valyuta.az-ın məlumatına görə, sözügedən şirkətin qanuni təmsilçisi olan Maturin Rüfət Rəşidoviçin ölkədən çıxışına məhdudiyyət qoyulmasının səbəbi Bakı şəhəri Lokal Gəlirlər Baş İdarəsinə ümumilikdə 6130,42 manat borcu olmasıdır.

Qeyd edək ki, sözügedən şirkətin Gəncə şəhərinin sabiq icra başçısı Elmar Vəliyevin qardaşı Elnur Vəliyevə məxsus olduğu iddia edilir. O, 2013-cü ildə Türkiyədə “Elva İnşaat Turizm Gida İhracat İthalat Sanayi ve Ticaret Limited” şirkətini qurub, növbəti il Bakıda şirkətin filialını açıb. Elnur 2013-cü ilin dekabrında Bakıda həm də “Elva Group” MMC-ni təsis edib. Şirkətin korporativ saytında onun mebel istehsalı ilə məşğul olduğu, Azərbaycanda və Ukraynada otel dekorasiya işləri gördüyü bildirilir. Bakıdakı Elva Hospital, Teatro Boutique Hotel, Teatro Rooms Hotel, bir neçə restoran və kafenin (Elvet Stackhouse, Elba Sea Food, Bakku Tea House və s.) ona məxsus olduğu iddia edilir.