Avstraliyanın onlayn təhlükəsizlik tənzimləyicisi bazar ertəsi "Telegram"ı uşaq istismarı və zorakı ekstremist materialların yayılmasının qarşısını almaq üçün görülən tədbirlər barədə suallara gec cavab verdiyinə görə təxminən 1 milyon Avstraliya dolları (640 min ABŞ dolları) məbləğində cərimələyib.  

Valyuta.Az xəbər verir ki, 2024-cü ilin mart ayında komissiya, "YouTube", "X" və "Facebook" da daxil olmaqla bir neçə platformadan "Telegram" və "Reddit"lə bağlı açıqlama tələb edib və bu platformaları ekstremistlərin canlı yayım funksiyalarından, alqoritmlərdən və tövsiyə sistemlərindən istifadə edərək istifadəçiləri cəlb etməsinin qarşısını almaqda yetərincə səy göstərməməkdə günahlandırıb.  

"Telegram" və "Reddit"dən platformalarında uşaq istismarı ilə bağlı materiallara qarşı mübarizə aparmaq üçün atdıqları addımlarla bağlı məlumat istənilib. Onlar may ayına qədər cavab verməli idilər, lakin "Telegram" yalnız oktyabr ayında cavab təqdim edib.  

"Vaxtında şəffaflıq Avstraliyada könüllü bir tələb deyil və bu addım bütün şirkətlərin Avstraliya qanunlarına riayət etməsinin vacibliyini bir daha vurğulayır", – e-Təhlükəsizlik Komissarı Culi İnman Qrant bəyanatında bildirib.  

Onun sözlərinə görə, "Telegram"ın məlumat təqdim etməkdəki gecikməsi e-Təhlükəsizlik Komissiyasının onlayn təhlükəsizlik tədbirlərini həyata keçirməsinə mane olub.  

"Telegram" dünya miqyasında nəzarət altındadır. Onun qurucusu Pavel Durov avqust ayında Fransada "Telegram"ın qeyri-qanuni fəaliyyətlər üçün istifadəsi ilə bağlı rəsmi istintaqa cəlb edilib. 

Qrant bildirib ki, iri texnologiya şirkətləri şəffaf olmalı və onların xidmətlərindən sui-istifadənin qarşısını almaq üçün tədbirlər görməlidirlər, çünki onlayn ekstremist materialların yaratdığı təhlükə getdikcə artır.  

"Əgər texnologiya sənayesindən hesabat tələb ediriksə, daha çox şəffaflıq olmalıdır. Bu səlahiyyətlər bizə bu platformaların ciddi və təhlükəli onlayn problemlərlə necə və ya heç cür mübarizə aparmadığını daha dərindən anlamağa imkan verir", – Qrant əlavə edib.  

Rəhim