Almaniya sakinləri hazırda elektrik enerjisi üçün 2021-ci illə müqayisədə orta hesabla 31% daha çox ödəyirlər. 

Valyuta.Az "TASS"a istinadla xəbər verir ki, bu barədə "DPA" agentliyi məlumat yayıb.  

Araşdırmaya görə, üç nəfərlik orta statistik ailə elektrik enerjisinə illik 5 407 avro xərcləyir. 2021-ci ildə bu göstərici 4 121 avro təşkil edirdi. Qeyd olunur ki, xüsusilə istilik xərcləri kəskin şəkildə artıb.  

"Qiymətlərin yüksəlməsi təkcə alış xərclərinin artması ilə deyil, həm də qaz şəbəkələri üzrə tariflərin yüksəlməsi və fosil yanacaq istifadəsi zamanı karbon qazı tullantılarının bahalaşması ilə əlaqədardır", - agentliyin məlumatında bildirilib.  

Araşdırmada vurğulanır ki, soba yanacağının qiyməti təxminən 35% artıb, istilik xərcləri isə orta hesabla 61% yüksəlib. 2021-ci ildən etibarən benzin və dizel yanacağının da müvafiq olaraq 15% və 21% bahalaşdığı qeyd olunur.  

"Orta hesabla istehlakçılar yanacaq üçün 17% daha çox ödəyirlər", - deyə araşdırmada bildirilir. Elektrik enerjisinin qiyməti də orta hesabla 17% artıb. Bunun əsas səbəbləri kimi şəbəkə tariflərinin yüksəlməsi və enerji təchizatçılarının elektrik enerjisi alış xərclərinin artması göstərilir.  

Araşdırmada vurğulanır ki, topdansatış qiymətlərinin yenidən yüksəlməsi, elektrik enerjisi xərclərinin artması və karbon qazı tullantılarının bahalaşması fonunda enerji qiymətlərinin gələcəkdə də yüksəlməsi ehtimalı yüksəkdir.  

Rəhim