"Pokemon GO"nun yaradıcısı "Niantic" oyun bölməsini Səudiyyə Ərəbistanına məxsus "Savvy Games Group"un mobil oyun şirkəti "Scopely"yə satmağa hazırlaşır. 

Valyuta.az xəbər verir ki, razılaşma tamamlandıqdan sonra "Niantic"in populyar mobil oyunlarının hüquqları da "Scopely"yə keçəcək.

"Pokemon GO"nun inkişaf etdiricisi "Niantic" oyun bölməsini satmağa yaxındır. Məsələyə bələd olan mənbələrin məlumatına görə, şirkət Səudiyyə Ərəbistanına məxsus "Savvy Games Group"un mobil oyun şirkəti "Scopely" ilə təxminən 3,5 milyard dollarlıq satış razılaşması əldə edə bilər.

"Bloomberg"in xəbərinə görə, bu müqavilə qarşıdakı həftələrdə elan edilə bilər, lakin hələ ki, tam təsdiqlənməyib. Satış baş tutarsa, "Pokemon GO" və "Niantic"in digər mobil oyunlarının hüquqları "Scopely"yə keçəcək.

2016-cı ildə bazara çıxan "Pokemon GO" artırılmış reallıq (AR) texnologiyasına əsaslanaraq oyunçulara açıq havada gəzərək Pokemon tutmaq, onları təlim etdirmək və döyüşdürmək imkanı verdi. Oyun əvvəlcə Avstraliyada istifadəyə verildi, daha sonra Yeni Zelandiya və ABŞ-da yayımlandı. Çıxışından cəmi yeddi gün sonra serverlərin oyunçu axınına tab gətirə bilməməsi onun nə qədər böyük təsir yaratdığını göstərib.

"Pokemon GO" 2016-cı ildə aylıq 232 milyon aktiv istifadəçi ilə zirvə nöqtəsinə çatdı. Lakin "Niantic" bu uğuru digər oyunlarında təkrarlaya bilməyib. 2023-cü ildə şirkət iqtisadi çətinliklər səbəbindən yüzlərlə əməkdaşını işdən çıxarmaq və "Marvel" temalı bir AR oyununu ləğv etmək məcburiyyətində qaldı. Eyni zamanda, "Harry Potter: Wizards Unite" oyunu da mənfi rəylər səbəbindən bağlanıb.

"Niantic" 2015-ci ildə müstəqil şirkət olmadan əvvəl "Google"un tərkibində fəaliyyət göstərirdi. Şirkətin baş icraçı direktoru Con Henke xəritələmə texnologiyası sahəsindəki təcrübəsindən istifadə edərək real dünya ilə qarşılıqlı əlaqəni təmin edən bir oyun təcrübəsi yaratdı. Şirkətin açıqlamalarına görə, "Pokemon GO" bütün dövrlərin ən çox yüklənən və ən gəlirli artırılmış reallıq tətbiqlərindən biri olub.

"Niantic"in oyun bölməsini almağa hazırlaşan "Scopely" son dövrlərdə genişlənmə strategiyası həyata keçirir. 2023-cü ildə "Savvy Games Group" tərəfindən 4,9 milyard dollara satın alınan "Scopely" oyun portfelini böyütmək üçün yeni imkanlar axtarır. Ötən il "Niantic" oyunlarını Birləşmiş Ərəb Əmirlikləri, Səudiyyə Ərəbistanı və Misir bazarına çıxarmaq üçün "Scopely" ilə əməkdaşlıq etmişdi. Bu müqavilə iki şirkət arasındakı münasibətlərin daha da möhkəmlənməsinə töhfə verə bilər.

Paşa Məmmədli