Milli Məclisin İqtisadi siyasət, sənaye və sahibkarlıq komitəsinin mayın 23-də keçirilən iclasında maliyyə naziri Samir Şərifov deyib ki, daxili borcların həcmi artıb.

O bildirib ki, vaxtilə Beynəlxalq Bankın sağlamlaşdırılması istiqamətində "Aqrarkredit" Bank Olmayan Kredit Təşkilatı tərəfindən ABB-nin toksik borcları alınırdı. Bunun üçün dövlət tərəfindən vəsait ayrılmışdı. Həm də bu toksik aktivlərin sağlamlaşdırılması üçün dövlət zəmanəti ilə istiqrazlar verilmişdi. Bu aktivlər balans qiyməti ilə alınırdı, lakin onun satışı real bazar qiymətindən aşağı olduğu üçün zərər əldə edilirdi.

Mövzu ilə bağlı Valyuta.az-a danışan iqtisadçı Əkrəm Həsənovun fikrincə, Samir Şərifov bununla demək istəyir ki, biz dövlət olaraq bir sıra şirkətlərə zamin durmuşuq, lakin bu uğursuz addım olub.

İqtisadçının sözlərinə görə, hansısa qurum öz istiqrazını buraxaraq onu satırsa, bu dolayısı ilə iş adamlarından borc almaq deməkdir:

"İstaqrazlar borc deməkdir. Yəni, istiqraz buraxan müəssisə deyir ki, siz istiqraz alın, mənə borc verin, bunun əvəzində sizə faiz ödəyəcəyəm. Lakin biznes adamları və şirkətlər hər belə buraxılan istiqrazlara etibar etmir".

Əkrəm Həsənov qeyd edib ki, belə istiqrazlara dövlət zəmanət verirsə, vəziyyət dəyişir:

"Çünki şirkətlər borcu qaytara bilməsə, dövlət qaytarır. Dövlət tərəfindən isə bu işi Maliyyə Nazirliyi icra edir. Bizdə çox halda istiqrazı buraxan şirkətlər ödənişi edə bilmir. Bu zaman isə həmin şirkətdən istiqraz alan şəxslər pulu dövlətdən tələb edir. Bu halda dövlət daxildən borclanır. Artıq o borc dövlətin sayılır və toksik olur". 

Davud