İş həyatında müsbət xəbərlərlə yanaşı, mənfi xəbərlər də almaq mümkündür. Məsələn, işçinin işdən çıxarılması haqqında məlumat alması bu xəbərlərdən biridir. İlk olaraq işdən çıxarılan şəxslər özlərini pis hiss etsələr də, bu xəbər sizə yeni qapılar da aça bilər.

İşdən çıxandan sonra gələcək karyeranız haqqında düşünməli və təcrübələrinizdən öyrənmək üçün özünüzə vaxt verməlisiniz. Bu məqamda bu 4 təklif sizə kömək edəcək.

1. Fikrinizi təmizləyin, enerjinizi düzgün yerə cəmləyin

Bir işdən qovulmaq travmatik ola bilər. Əgər işdən ayrılma narahatlığınız varsa, bir müddət özünüzə inam probleminiz olacaq. Özünüzə inamınızı aşağı salan neqativ fikirlər üzərində dayanmadan qavrayışınızı fərqli istiqamətə yönəltməyə çalışmalısınız. Təbii ki, baş verənləri həzm etmək və şokdan çıxmaq üçün ilk bir neçə gündə duyğularınızı sərbəst buraxa bilərsiniz. Ola bilsin ki, bu, tez baş verməyəcək, amma sonda bu məsələ keçmişdə qalacaq. Bundan sonra, yeni addımlar atmaq üçün cəsarət toplamağa diqqət etməlisiniz.

2. Bacarıqlarınızı nəzərdən keçirin

Xüsusilə, eyni yerdə uzun bir iş müddətindən sonra ayrılmısınızsa, həm sektor, həm də rolun tələb etdiyi yeni səlahiyyətlər baxımından çatışmazlıqlarınız ola bilər. Bundan əlavə, illər ərzində əldə etdiyiniz səriştələri hansı rola, sektora necə köçürə biləcəyinizi nəzərdən keçirməlisiniz. Bu aspektləri müəyyən etmək sizi inkişaf etdirə və təkmilləşdirə biləcəyiniz sahələri tapmağa kömək edəcək. Başqa bir seçim, işlədiyiniz insanlardan rəy almaqdır. Performansınız haqqında dəyərli fikirlər verə bilən və ola bilməyən hər hansı bir kor nöqtəyə işıq sala bilən keçmiş həmkarlarınızla əlaqə saxlayın. Rəylərə açıq olun, çünki o, şəxsi və peşəkar inkişaf üçün dəyərli vasitə ola bilər.

3. Növbəti addımı düşünün və qərar verin

Bir işi geridə qoyduğunuz zaman qarşıda qeyri-müəyyənlik var kimi görünə bilər, lakin bu qeyri-müəyyənliyi formalaşdıracaq şəxs sizsiniz. Unutmayın ki, çəkdiyiniz yolda irəli gedəcəksiniz. Bunu peşəkar məqsədlərinizi, dəyərlərinizi və istəklərinizi yenidən qiymətləndirmək üçün yaxşı fürsət kimi görün. Özünüzə bu sualı verin: "Mən həqiqətən bundan sonra nə etmək istəyirəm?"

Bəlkə, siz sahibkarlığı sınamaq üçün fürsət axtarırdınız, bəlkə də komfort zonanızdan kənarda yeni təcrübələr qazanmaq istəyirdiniz, bəlkə də son rolunuz özünüzü yetərincə ifadə etməyə imkan vermədi, amma dəqiq qərar verə bilmədiniz. Bütün bu fərziyyələr sizin ümumi karyera məmnuniyyətinizi və şəxsi inkişafınızı formalaşdıracaq məqamlardır. Lazım olan sualları verib, səmimi cavablar aldıqda düzgün addım atmağa hazır ola bilərsiniz.

4. İş üçün müraciət etməyə başlayın

Nə etmək istədiyinizə qərar verdikdən sonra mütəmadi olaraq iş elanlarını izləməyə başlayın və uyğun gördüyünüz işlərə müraciət edərək yeni karyeranıza doğru ilk addımı atın. Burada vacib olan müraciətiniz üçün CV hazırlamaqdır. Yeni rolunuzdan əvvəl CV-nizi yeniləməklə yanaşı, müxtəlif vəzifələrə xas olan səriştələrinizi vurğulayan çoxsaylı CV-lər də yaratmalısınız.

Məsələn, əgər sənayeni dəyişmək istəyirsinizsə, peşəkar təcrübə bölmənizdə yeni sahənizlə əlaqəli xüsusi rolları və bacarıqları vurğulamalısınız.

Əvəz Həsənov