Çin İnkişaf Forumunda iştirak etmək üçün Pekində olan bir neçə ABŞ şirkətinin rəhbərləri çərşənbə günü Çinin ali lideri ilə görüşə dəvət olunublar. 

Valyuta.az xəbər verir ki, bu barədə "Bloomberg" yazıb.

Məlumatlı mənbələrin bildirdiyinə görə, yazılı dəvətlərdə onun adı göstərilməsə də, söhbət Çin prezidenti Si Tszinpinlə mümkün görüşdən gedir.

Potensial iştirakçılar arasında "Pfizer" baş direktoru Albert Bourla, "FedEx"dan Raj Subramaniam və "Amway"ın baş direktoru Milind Pant var. Bəzi rəhbər işçilər Çində qalma müddətini uzatmaq məcburiyyətində qalıblar.

Görüş Pekinin birbaşa xarici investisiyaların 2022-ci ildə 30 ilin ən aşağı səviyyəsinə düşdüyü üçün xarici investorların inamını artırmaq səylərinin bir hissəsi kimi qəbul edilir. ABŞ ilə siyasi gərginlik, pandemiya məhdudiyyətləri və məlumat təhlükəsizliyinə nəzarətin gücləndirilməsi səbəbindən əhval-ruhiyyə pisləşib.

Bununla belə, keçən həftə Çin xarici bizneslərin şikayətlərinə cavab olaraq görülən transsərhəd məlumat axını ilə bağlı qaydaları yüngülləşdirib.

Dəvət olunmuş rəhbərlərdən biri bu görüşü APEC-in noyabr ayında San-Fransiskoda keçirilən sammitində başlanmış dialoqun davamı kimi qiymətləndirir. Burada Çin rəhbəri top-menecerlərlə, o cümlədən "Apple"ın baş direktoru Tim Kukla şam yeməyində iştirak edib.

"Çin hökuməti Çin və ABŞ-ın biznes ictimaiyyətini və digər sektorlarını dostluq mübadiləsi və əməkdaşlığa həvəsləndirir və dəstəkləyir", deyə Çin Xarici İşlər Nazirliyinin sözçüsü Lin Jian çərşənbə axşamı keçirdiyi brifinqdə bildirib.

Paşa Məmmədli