17 mart tarixindən etibarən həftəsonları Xaqani bağının yaxınlığındakı küçələrdə nəqliyyatın hərəkəti məhdudlaşdırılacaq.

Bununla bağlı  Rəqəmsal İnkişaf və Nəqliyyat Nazirliyi məlumat yayıb. Bildirilib ki, paytaxtın Zərifə Əliyeva (Rəsul Rza küçəsi ilə kəsişmədən sonra), Əbdülkərim Əlizadə, Tərlan Əliyarbəyov və Yusif Məmmədəliyev küçələrində nəqliyyat vasitələrinin girişinə məhdudiyyət tətbiq olunacaq və bu ərazilər piyadaların istifadəsinə veriləcək. Açıqlamada bildirilib ki,  nəqliyyat vasitələrinin hərəkətinə məhdudiyyət qoyulacaq küçələrin xüsusi tranzit əhəmiyyəti yoxdur. Bu küçələr, əsasən, parklanma məqsədilə istifadə edilir. Bakı şəhərinin mərkəzi hər zaman sakinlərin və qonaqların ən sıx ziyarət etdikləri məkandır. Həftəsonları isə piyadaların sayı dəfələrlə artır. Ərazidə böyük piyada axınının müşahidə edilməsi burada təhlükəsiz istirahət zonasının yaradılmasını zəruri edib. 

Mərkəzi küçələrlə bağlı verilən bu qərarla həmin əraziyə yaxın digər küçələrdə avtomobilin sıxlığı arta bilər?

Bununla bağlı Valyuta.az-ın suallarına cavab verən nəqliyyat eksperti Rövşən Həsənov bildirib ki, bu küçələrdə tətbiq olunan məhdudiyyət yalnız orda fəaliyyət göstərən və yol hərəkət iştirakçısı olan piyadaların tam rahat, təhlükəsiz hərəkət etməyinə səbəb olacaq. Bu qərarın tək müsbət cəhəti budur:

“Bundan əlavə bu qərarla bağlı bir neçə variant var. Əslində orda doğru vurğulanır ki, bu küçələrdən parklanma üçün istifadə olunur. O küçələrin ətrafda istəyən insanlar, taksi fəaliyyəti ilə məşğul olan şəxslər, yəni, həmin əraizlərdə parklanma edən şəxslər avtomatik olaraq başqa küçələrə yönələcək”. 

Bu küçələrə tətbiq olunan məhdudiyyətin ətraf küçələrdə nəqliyyatın hərəkətinə də təsirləri haqqında danışan ekspert deyib ki, bu küçələrə tətbiq edilən məhdudiyyət digər alternativ küçələrə təsirsiz keçməyəcək:

“Həmin küçələrdə mütləq yüklənmələr baş verəcək. Bu ərazidə işləyənlər, yaşayanlar,  ora qonaq gələn şəxslər üçün digər alternativ küçələrdə parklanma üçün şərait yaradılacaq ki, bu da digər küçələrdə yüklənməyə səbəb ola bilər”. 

Davud