Sosial şəbəkələrdə avtomobili satarkən sığorta müqaviləsinə xitam vermək lazım olduğu qeyd olunur. Bəzi şəxslər avtomobilini satdıqdan sonra olunan qəzaya görə riskli sığortaçı hesab edildiklərini qeyd edirlər. Bu səbədən onların sığorta haqqı artmış olur. Məsələn, 80 manat olan sığorta, 375 manat kimi qiymətləndirilir. Bu kimi hallarla qarşılaşan şəxslər nə etməlidirlər?

Sığorta eksperti İlkin İbrahimov Valyuta.az-a bildirib ki, qeyd edilən problemlə üzləşməmək üçün hazırkı qaydalara görə vətandaşlar avtomobil alqı-satqısı etdikdən sonra uzun prosedur keçməlidir:

“Yəni, sığorta şirkətinin baş ofisinə yaxınlaşmalı, avtomobili satan tərəf sığorta şəhədnaməsinə xitam verdirməli, qalan günlərin pulunu geri almalıdır. Avtomobili yeni alan şəxs isə yenidən sığorta şirkətinə müraciət etməli və yeni sığorta şəhadətnaməsi əldə etməlidir”.

Ekspert qeyd edib ki, sığorta müqaviləsinə xitam verilən zaman baş verən qəzaya görə sığorta haqqının artması düzgün deyil:

“Belə hal olduqda, İcbari Sığorta Bürosu istehlakçıların hüquqlarını pozur. Müəyyən şəxsin adına bağlı olmayan sənədlə əlaqəli olaraq, həmin şəxsin sığorta haqqı artmış olur. Digər tərəfdən burada prosesin bir qədər elektronluqdan kənar olduğu məsələ var. Hansı ki, biz Dövlət Yol Polisinə avtomobil alqı-satqısı ilə əlaqədar müraciət edən zaman orada bir neçə prosedurdan keçib, ərizələr yazırıq. Həmin yerdə sığorta ilə bağlı əlavə ərizə ola bilər ki, şəxsin sığorta şəhadətnaməsi avtomobili satdığı şəxsə keçirilsin. Bundan sonra həmin sənəd elelektron şəkildə İcbari Sığorta Bürosuna ötürülə bilər və beləliklə, bu problem aradan qalxmış olar. Bu qaydaları düzəltməmək ilə İcbari Sığorta Bürosu istehlakçıların hüquqlarını pozur”.

“İstehlakçı hüquqlarını qoruyan Mərkəzi Bank da bu məsələdə müşahidəçi rolunu oynayır. İcbari Sığorta Bürosunun müşahidə şurasında Mərkəzi Bank təmsil olunur. Buna görə də Mərkəzi Bank bundan xəbərdardır, lakin problemin aradan qaldırılması ilə bağlı tədbir görülməməsi çox təəssüfləndirici haldır” – deyə ekspert qeyd etdi.

Əvəz Həsənov