“Caspian Energy Club”ın İdarə heyətinin yeni tərkibi seçilib.

Bu barədə Valyuta.az-a "Caspian Energy Club"ın Sədrinin Birinci müavini və qrupun Baş Maliyyə direktoru Rasim Mahmudov məlumat verib.

Bildirilib ki, bu il "Caspian Energy Club"ın İdarə heyətinin üzvlərinin növbəti seçkiləri 29 fevral tarixində başlayıb və iki gün davam edib. Ümumi səslərin sayı 1059 nəfər təşkil edib. Onlardan 971 səs anket formatında, 88-i isə onlayn formatda səs verib.

Səsvermə nəticələrinə əsasən “Caspian Energy Club”ın yeni İdarə heyətinə Telman Əliyev (Caspian Energy Club), Zərifə Həmzəyeva (Gazelli Group), Rəşad Abasov (ASE Şirkətlər Qrupu), Natiq Paşayev (Caspel), Fariz Sultan-Əhmədi (By Mygroup Holding), İlqar Nuriyev (Veysəloğlu), Əsəd Nəsrullayev (Debet Safety) və Səbinə Əliyeva (GHRS) daxil olublar.

“İdarə Heyətinin sədri vəzifəsinə 319 (30.12 %) səs sayı ilə Telman Əliyev seçilib. Yaxın vaxtlarda İdarə Heyətinin üzvlərinin ilk iclasının keçiriləcəyi gözlənilir. İclas çərçivəsində qurumun növbəti il üçün fəaliyyət strategiyası, eləcə də qısa və uzunmüddətli hədəfləri müəyyən ediləcək. Həmçinin, “Caspian Energy Club”ın yeni İdarə heyətinin ilk iclası çərçivəsində komitələrin, işçi qrupların və regional nümayəndəliklərinin rəhbərləri təyin olunacaq” – deyə, Rasim Mahmudov məlumat verib.

“2023-cü il bizim üçün çox uğurlu, pozitiv və səmərəli keçdi. 1 il ərzində biz dünyanın 20 ölkəsində 150-dən çox tədbir təşkil etdik. 2023-cü il Ulu Öndər Heydər Əliyevin 100 illik yubileyinə həsr olunduğu üçün Azərbaycandakı 100-cü tədbiri təntənəli sürətdə Gülüstan sarayında keçirdik.

Ümidvaram ki, biz yeni ildə də “Caspian Energy Club”da mövcud olan ailə mühitini, müsbət ab-havasını, yüksək intensivliyini, səmimi, səmərəli və müsbət networking imkanlarını qoruyub saxlaya biləcəyik”, - deyə, Rasim Mahmudov qeyd edib.