Pərakəndə satışdan topdan satışa keçid zaman sahibkarlar ciddi problemlərlə üzləşir. Çoxları bu keçidi planlaşdırmadan edir. Sonda da deyilir ki, topdan satışa keçdim satışlar istədiyim kimi olmadı. Yəni pərakəndə satışdan topdan satışa keçərkən hansı əsas fərqləri nəzərə almaq lazımdır?

Valyuta.az-a açıqlamasında "SAT Group” şirkətinin həmtəsisçisi, satış təlimçisi Azad Qəhrəmanov bildirib ki, keçid zamanı problemlərin yaranması təbii haldır: “Bunun səbəbi pərakəndə satışa xas yanaşmanın topdan satışda uğur gətirməməsidir. Əsas fərq ondadır ki, pərakəndə satışda biz birbaşa məhsulun son istifadəçisi ilə işləyirik. Məhsulu onlara bəyəndirmək, onların tələblərinə uyğun olduğunu göstərmək və təqdim etmək əsas məqsəddir.

Topdan satış isə tamamilə fərqlidir, çünki burada məhsulu son istifadəçiyə deyil, onu növbəti dəfə satacaq bir şəxsə təqdim edirik. Bu şəxs adətən, iş adamı olur və məhsul onun şəxsi istifadəsi üçün yox, biznes məqsədləri üçün nəzərdə tutulur. Məhsul onun üçün gəlir mənbəyidir. Buna görə də, topdan satışda yanaşmamız fərqli olmalıdır. Məhsulun şəxsi ehtiyaclara necə uyğun olduğunu deyil, onun vasitəsilə necə daha çox gəlir əldə edə biləcəyini izah etməli və bu məsələdə onu inandırmalıyıq”.

“Məhsulu satmaqla iş bitmir...”

A.Qəhrəmanov vurğulayıb ki, müştərilərə sadəcə məhsul satmaqla kifayətlənməməli, onlara bizim məhsullarla və ümumilikdə bizimlə işləməklə daha çox gəlir qazana biləcəkləri yolları göstərməliyik: “Yalnız bu halda topdan satışda uzunmüddətli müştərilər və partnyorlar qazanmaq mümkündür. Topdan satışda fərqli yanaşma tələb olunur. Burada müştərilərə “partnyor” kimi yanaşılır və satış sonrası dəstək xüsusi əhəmiyyət daşıyır. Məhsulu satmaqla iş bitmir, partnyorların məhsulu son istifadəçilərə çatdırmasına da kömək etmək lazımdır. Əgər topdan satış müştəriləri yaxşı gəlir əldə edirsə, onlar bizimlə daha uzun müddət əməkdaşlıq edəcəklər”.

Sonda topdan satış müştəriləri ilə davamlı ünsiyyət qurmağın vacibliyini də qeyd edib: “Onlarla yalnız alış-veriş zamanı yox, mütəmadi olaraq əlaqə saxlanılmalı, onların ehtiyacları öyrənilməli, satışlarının vəziyyəti və ehtiyac duyduqları dəstək müzakirə edilməlidir. Belə yanaşma onların satışlarını artırmaq və daha çox gəlir əldə etmələrinə kömək edəcək. Bu, həm onların, həm də bizim biznesimizin uzunmüddətli uğuruna xidmət edir”.

Maya Hüseynova