Erkən nikahlarlarla bağlı ən yüksək göstəricilər Qazax-Tovuz, Mərkəzi Aran və Qarabağ iqtisadi rayonlarında qeydə alınıb.

Bunu Ailə, Qadın və Uşaq Problemləri üzrə Dövlət Komitəsinin şöbə müdiri Taliyə İbrahimova deyib.

Onun sözlərinə görə, 2022-ci ildə 18 yaşadək analar tərəfindən 2011 uşaq dünyaya gətirilib. Bu da  2021-ci illə müqayisədə 361 nəfər artıqdır.

Qeyd edək ki, 10-15 il bundan öncə erkən nikahlarda “liderliyi” ölkənin cənub rayonları və Bakı kəndləri tuturdu. İndi isə açıqlamadan göründüyü kimi, bu istiqamətdə Qazax-Tovuz, Mərkəzi Aran və Qarabağ iqtisadi rayonları “önə” çıxıblar.

Valyuta.az-a açıqlama verən “Təmiz dünya” İctimai Birliyinin sədri Mehriban Zeynalovanın fikrincə, erkən nikahların çoxluğu məsələsində Qazax-Tovuz, Aran və Qarabağ ərazilərinin “önə” çıxmasında həmin tendensiyaya qarşı mübarizə zamanı bu rayonların diqqətdən kənarda qalması öz sözünü deyib:  

“Erkən nikanlarla bağlı mübarizə strategiyası və diqqət əvvələr ölkəmizin cənub bölgəsinə yönəlmişdi. Belə düşünülürdü ki, erkən nikahların cənub rayonlarında çox olması ilk növbədə məhz həmin bölgədən gələn dini təsirlərin nəticəsi ilə bağlı idi. Bu mənada ölkənin digər rayonları, o cümlədən çoxsaylı ziyalıları ilə məşhur olan Qazax-Tovuz ərazisi bir növ diqqətdən kənarda qaldı. Qazax-Tovuz rayonları erkən nikah məsələsində aktiv olmayıb. Bu ərazi insanları təhsilə çox meyllidir. Həmin bölgədə qızların oxumasına ciddi diqqət verilirdi. Amma indi əks vəziyyətin yaranması mənfi təsirlərin virus xarakterli daşıması və bu müstəvidə adı çəkilən bölgələrin diqqətdən kənarda qalmasının nəticəsidir. 

Bir çoxları belə vəziyyətin yaranmasını iqtisadi amillərlə bağlayır. Amma bunun belə olduğunu düşünmürəm. Düşünürəm ki, qızlarımızın təhsillə meyllənməsi üçün fərqli strategiyalar qurmalıyıq”.

Ramiz