2024-cü ilin yanvar və fevral aylarında Aralıq dənizi regionunda quraqlıq baş verib, Avropanın cənubunda və Şimali Afrikada orta səviyyədən aşağı yağıntılara səbəb olub. 

Valyuta.az xəbər verir ki, bu barədə Avropa Quraqlıq Rəsədxanasının (EDO) rəsmi saytındakı hesabatda deyilir.

EDO hesabatına görə, Cənubi Avropada torpaqların 45%-dən bir qədər çoxu rütubət stresindən əziyyət çəkib, 10 fevral tarixinə qədər torpaqların 2,8%-i ən yüksək quruluq səviyyəsinə çatıb.

Avropa İttifaqının iqlim dəyişikliyi araşdırması xidmətinin Kopernik ekspertləri aydınlaşdırıblar ki, onların məlumatlarına görə, quraqlıq bütün Avropa və Şimali Afrikanın 1/4-də müşahidə olunur. Vəziyyət yanvar ayının sonundan bəri pisləşib, lakin quraqlığın Aralıq dənizi ərazilərinin 31,3%-ni təsir etdiyi keçən ilin eyni dövrü ilə müqayisədə bir qədər yaxşıdır.

İtaliyanın cənubu, İspaniya, Mərakeşin şimalı, Əlcəzair və Tunis də daxil olmaqla Qərbi Aralıq dənizindəki bölgə bu il yağıntıların olmamasından xüsusilə ağır zərbə alıb.

İspaniya Kataloniyasının səlahiyyətliləri quraqlığı son əsrin ən pisi adlandırıb və Kataloniya su anbarlarında suyun səviyyəsi 16%-dən aşağı düşdüyü üçün fövqəladə vəziyyət elan edib.

EDO 2024-cü ilin yazının həmişəkindən daha isti olacağını proqnozlaşdırır ki, bu da bəzi çayların qidalandığı dağlarda qar qıtlığını pisləşdirəcək.

Paşa Məmmədli