“Bunun əsas səbəbi Mərkəzi Bankın son 3 iclasında faiz dərəcəsini aşağı salması ilə bağlıdır”.

Bunu Valyuta.az-a açıqlamasında iqtisadçı ekspert Xalid Kərimli Mərkəzi Bankın notlarının faiz dərəcələrində kəskin azalmaların səbəblərini izah edərkən deyib. Ekspert bildirib ki, Mərkəzi Bank faiz dərəcəsini aşağı salanda məhz bu qısa müddətli not bazarında faiz dərəcələrini aşağı salır:

“Və gözləyir ki bu da aşağı düşəndə banklar digər bazarlarda qiyməti aşağı salsınlar. Mərkəzi Bankın mərkəzləşdirilmiş  kredit üzrə faiz  dərəcələri məhz ilkin olaraq bu notların qiymətinə təsir göstərir. Çünki Mərkəzi Bank deyir ki, mən artıq sizdən bu qiymətə vəsait cəlb edəcəm. Bazar son dövrlərdə işlək vəziyyətə gətirilib, burada məqsəd faiz qərarının ümumi bazara təsirini təmin etməkdir. Bank bazarında gözlənilir ki, Mərkəzi Bankın bu addımları bir neçə aya kommersiya bazarına da təsir göstərsin”.

Xalid Kərimli kommersiya banklarının əlindəki vəsaiti Mərkəzi Banka daha aşağı faizlə verdiyini vurğulayıb:

“Bu da digər istiqamətlərdə faiz dərəcəsinə təsir edə bilər. Mərkəzi Bankın əsas dərdlərindən biri apardıqları faiz dərəcələri siyasətinin transmissiyasının artmasıdır. Ona görə də bu notları işə saldılar”.

Qeyd edək ki, Mərkəzi Bankın notlarının faiz dərəcələrində kəskin azalmalar qeydə alınıb. Ötən ilin avqustunda 8.29 faizə təklif edilən 28 günlük notlar üzrə son faiz dərəcəsi indi 6.60 faizə enib. 

Aylin