Ölkəmizdə hərbi xidmətdən keçmə qaydalarına dəyişiklik edilə bilər. 

Bunu Milli Məclisin bu gün keçirilən iclasında deputat Elnur Allahverdiyev deyib:

“Bizdə hərbi xidmət 1 il 6 ay, ali təhsillilər üçün 1 il müəyyən edilib. Təklifim ölkəmizdə hərbi xidmətdən keçmənin klassifikasiyasının tətbiq imkanları barədədir. Bu, bir sıra dünya ölkələrində, həmçinin qardaş və strateji müttəfiqimiz olan ölkə, yəni Türkiyənin təcürbəsində də həyata keçirilir. Tutaq ki, hərbi xidmət bir il yarım, yaxud ali təhsilli vətəndaşlar üçün bir il müddət təşkil edirsə, buna alternativ olaraq büdcəyə vəsaitin ödənilməsi müqabilində xidməti 2, yaxud 6 ay müddətində keçmək olar”. 

Mövzu ilə bağlı Valyuta.az-a açıqlamasında hərbi ekspert Üzeyir Cəfərov bildirir ki, məsələnin həlli Alternativ Xidmət Haqqında qanunun qəbulundan keçir: 

“Bu məsələ əslində çoxdan həll olunmalı idi. Azərbaycanın üzərinə götürdüyü öhdəliklərdən biridir. Bunun üçün alternativ xidmət haqqında qanun qəbul edilməlidir. Dini etiqad və ya digər səbəblərdən hərbi xidmət keçmək istəməyənlər ya Əmək və Əhalinin Sosial Müdafiəsi Nazirliyi, ya da Səhiyyə Nazirliyi xəttilə alternativ xidmət keçməlidirlər. Onların xidmət müddəti də hərbi xidmətdə olanların xidmət müddətindən fərqlənməlidir. Türkiyədə də bu sistem mövcuddur. Azərbaycan 2025-ci ilə qədər ordusunu bu sistemə uyğunlaşdırmalıdır. Hərbi xidmət etmək istəməyənlər güc strukturlarının büdcəsinə ödəniş etməli olacaq. Qarabağ problemi həll edildiyindən artıq alternativ xidmət haqqında qanun mütləq şəkildə qəbul edilməlidir. Alternativ xidməti də hər adam keçə bilməz, onun da tələbləri var. Elm və Təhsil Nazirliyi, icra strukturları, yerli idarəetmə orqanları bu barədə qərar verir. Məsələ deputat Elnur Allahverdiyevin təklif etdiyi şəkildə qəbul olunsa, dolaşıqlıq və lazımsız müzakirələrə səbəb olacaq. Amma alternativ xidmət haqqında qanun qəbul olunarsa, bütün məsələlər yoluna düşəcək, neqativ halların sayı da azalacaq”.

Ramiz