Azərbaycan artıq 25 ildən çoxdur ki, yazı-pozu işləri rəsmi olaraq latın qrafikalı əlifba əsasında həyata keçirilir. Lakin günü bu gün də elə insanlar var ki, hələ də latın qrafikası ilə nə yaza, nə də oxuya bilirlər. Belədə onlar hansısa sənəd hazırlayarkən və ya onunla tanış olarkən çətinlik çəkirlər. Onların fazi nisbətinin nə qədər olduğunu demək çətindir. Amma hər halda az da olsa belə insanlar da var. 

Görəsən, sözügedən problemi həll etmək üçün hansı addımlar atılmalıdır? 

Valyuta.az-a açıqlama verən təhsil eksperti Kamran Əsədovun fikrincə, sözügedən problemin həlli latın əlifbası ilə yazıb-oxumağı bilməyənlər üçün təlimlərin təşkil edilməsindən keçir:

“Azərbaycan XX əsrdə 4 dəfə əlifba dəyişib. Əlifbanın dəyişməsilə isə nəsillər arasında zəncir qırılır. Vaxtilə formalaşmış ədəbiyyat bankından, kitablardan sonrakı nəsillər istifadə edə bilmir. Ukrayna, Gürcüstan və Mərkəzi Asiya ölkələrində problemin həlli üçün kitablarda hər iki dildən istifadə olunur. Azərbaycanda 2004-cü ildən etibarən bütün kiril əlifbalı kitablar Azərbaycan dilinə tərcümə olunub. 

Latın qrafikası ilə yazıb oxuya bilməyən insanları isə təlimlərə cəlb etməliyik. Yaxşı olar ki, hər bir kənd və qəsəbədə latın qrafikası ilə oxumaqda çətinlik çəkən yaşı yuxarı olanlar üçün qısa müddətli təlimlər təşkil edilsin. Dəfələrlə bunu təklif etmişik. Bu həm də dövlətin məşğulluq siyasətinə kömək edir. Həmçinin, alternativ kitabların bir vərəqi şərti olaraq, latın qrafikası ilə, digər vərəqi isə kiril əlifbası ilə yazılmalıdır. Bu yoldan istifadə etməklə də mövcusd problemi aradan qaldırmaq olar”.

Ramiz