“Özəl Pensiya Fondu vətəndaşlara əlavə seçim verəcək. İcbari pensiya fonduna ödəmələr öz yerində qalacaq. Vətəndaş, işləyən şəxs, yaxud da iş yerləri özü vətəndaşa şərti şəraiti təmin edəcək ki, icbari pensiya ilə paralel Özəl Pensiya Fonduna da filan qədər vəsait köçürəcəm. Bu könüllü məsələlərdir”.

Bunu Valyuta.az-a açıqlamasında iqtisadçı ekspert Xalid Kərimli Özəl Pensiya Fondunun məqsədlərindən danışarkən deyib. Ekspert güman edir ki, bu Azərbaycanda gözlənilən formada olmayacaq:

“Şirkətdə təkçə əmək haqqı yox, həm də Özəl Pensiya Fondu maraqları ilə işçini cəlb eləməyə çalışacaqlar. Çünki  Azərbaycanda yaxşı iş yeri tapmaq işçi üçün problemdir. Amma mahiyyətinə gəlincə, iş yerinin seçməsinə ehtiyac yoxdur, biz özümüz də seçə bilərik. Məsələn, deyə bilərik ki, mənim əmək haqqımdan iki faiz Özəl Pensiya fonduna köçür. Artıq burada qaydalar olur. Qanunvericilik qəbul edilmədiyinə görə, hansı formada pensiya planı təqdim etdiklərin bilmirik. Qərb təcrübəsinə əsasən deyə bilərəm ki, plan iki formada olur. Ya bərabər paylanmış, yəni indiki bizim pensiyalarımıza əlavə olunur, ya da birdəfəyə pulunuzu götürə bilirsiniz”.

Xalid Kərimli qeyd edib ki, burada təkcə yığılmış pul deyil, Özəl Pensiya Fondları vətəndaşların pullarını investisiyaya qoyur:

“İstiqraz alaraq fondu idarə edirlər. Gəlirlərindən də fondun iştirakçısı olan vətəndaşlara pay düşür. Özəl Pensiya Fondları uğurlu da ola bilər, uğursuz da. Fond çalışır ki, vətəndaşların yığılan pulunu artırsın. Bu seçim olacaq, kim istəyir fonda üzv olacaq, kim istəyir olmayacaq. Bu ölkədə uzun müddətli pul resurslarının də mənbəyini formalaşdıracaq”.   

Qeyd edək ki, Dövlət Sosial Müdafiə Fondunun sədri Himalay Məmişov mətbuat konfransı zamanı çıxışında Azərbaycanda özəl pensiya fondunun yaranması ilə bağlı normativ sənədlərin hazır olduğunu qeyd edib:

“Bir ay ərzində layihələr aidiyyəti qurumlara göndəriləcək”.

Aylin