“Qadınlara qarşı zorakılıq hallarının baş verməsində “TikTok” və digər sosial şəbəkələrin də təsiri var. Amma onun rolunun böyük olduğunu təsdiq edə bilmərəm. Çünki əlimdə faktlar yoxdur”. 

Valyuta.az-a açıqlamasında bunu sosioloq Əhməd Qəşəmoğlu qadına qarşı zorakılıq hallarının baş verməsində Tik-Tok və digər sosial şəbəkələrin böyük rolunun olduğu barədə bəzi ekspert və hətta deputatlar tərəfindən səslənən fikirləri şərh edərkən deyib:

“İstənilən davranışa təsir edən 4 amil var. İnsanın öz şəxsi xarakteri, mühit, aldığı informasiya və üstünlük verdiyi dəyərlər prosesə öz təsirini göstərir. “TikTok” baxan kişi və qadınlara buradan aldıqları informasiya davranışa təsir edir, nəticədə qarşıdurma yaranır. Bu fonda qadınların özündə, davranışlarında da müəyyən dəyilikliklər ola bilər”. 

Həmsöhbətimiz deyir ki, bütün hallarda əsas diqqəti nələrin zorakı hallara təsir etdiyinə yönəlməyimiz doğru deyil. O qeyd edir ki, zamanın gətirdiyi yeniliklərdən faydalı şəkildə istifadə etməyi də öyrənməliyik:  

“Fikirləşməliyik ki, internet və yaranan yeni xüsusiyyətlər zamanın bir atributudur və ondan qaça bilmərik. Sadəcə, onlardan optimal, düzgün istifadə etmək barədə düşünməliyik. TikTok kimi sosial şəbəkələrdə isanlar arasında mədəniyyəti təlqin etməliyik. Çünki burada bəzən maraqlı məlumatlar da olur. Yəni eyni şey insan davranışına faydalı təsir göstərdiyi kimi, mənfi mənada da təsir edə bilər. Ona görə də əsas diqqəti zamanın gətirdiyi yeniliklərdən faydalı şəkildə istifadə mədəniyyətini öyrənməyə yönəltməliyik”. 

Ramiz