Bu ilin III rübündə Azərbaycanda 13 bankın aktivləri artdığı halda 11 bankda (Ləğv prosesində olan “Muğan Bank” daxil olmaqla) azalma müşahidə edilib.  

Valyuta.az xəbər verir ki, üç iri bank - “Kapital Bank” (515 mln. AZN), “Bank Respublika” (159 mln. AZN) və “XalqBank” (114,4 mln. AZN) 3-cü rübdə aktivlərini 100 milyon manatdan çox artırıb. Müvafiq olaraq sözügedən bankların aktivləri 8,46 mlrd. manat, 1,9 mlrd. manat və 3 mlrd. manat təşkil edib. İlk beşlikdə yer alan “AccessBank” 2023-cü ilin II rübü ilə müqayisədə III rübdə aktivləri 76,9 milyon manat artaraq 1,4 mlrd. manata, “Yelo Bank”da isə 65,2 milyon manat artaraq 912,1 milyon  manata çatıb. 

Son 3 ayda ən çox kiçilən bank isə ABB olub. Bankın aktivləri 315 milyon manat azalaraq 11,8 mlrd. manatdan 11,43 mlrd. manata enib. Qeyd edək ki, hazırda Azərbaycanda fəaliyyət göstərən 5 bankın aktivləri 315 milyon manatdan azdır. 

Son dövrlər əsas iri korporativ bank olan “PAŞA Bank”ın göstəricilərində azalma müşahidə edilir. Bu bankın aktivlərində də özünü göstərir. Belə ki, bu ilin 3-cü rübündə bankın aktivləri 143,6 milyon manat kiçilərək 8,23 mlrd. manata enib. 

Yenicə lisenziyası ləğv edilən “Muğan Bank” son hesabatına əsasən 74 milyon manat, “Premium Bank” 59,4 milyon manat, “Unibank” 32,7 milyon manat kiçilib. Digər 5 bankın aktivlərində azalma 5 milyon manatdan az olub.

Leyli