Böyük Britaniyada 2,1 milyon funt-sterlinqə alıcısı tapılan şotland viskisi hərracda satılan ən bahalı içki olub. 

Valyuta.az xəbər verir ki, Londondakı "Sotheby's" hərrac evində satışa çıxarılan 1926-cı ilin istehsalı olan "Macallan" viskisi təxmin edilən qiymətdən iki dəfə baha satılıb. Bundan əvvəl "Sotheby's" viskinin 750 min funt-sterlinqə satılacağının gözlənildiyini açıqlamışdı. Hərrac evinin viski meneceri Conni Fovl satışdan əvvəl şüşədən çox kiçik bir damcı dadmağa icazə verildiyini söylədi. Viskinin çox zəngin tərkibə malik olduğunu ifadə edən Fovl, gözlənildiyi kimi içkidə bol ədviyyat, quru meyvə və ağac ləzzətlərinin hiss edildiyini söylədi.

"Macallan" 1926, 1986-cı ildə qablaşdırılmazdan əvvəl 60 il qaranlıq palıd çəlləklərində yetişdirilib ki, bu da öz rəngində əksini tapıb. Şotlandiyanın şimalındakı Moray bölgəsində "263" nömrəli çəlləkdə illərlə köhnəlmiş cəmi 40 şüşə viski istehsal edilib. Amma bunların heç də hamısı satışa çıxarılmayıb. Bəzi şüşələr brendin ən sadiq müştərilərinə təklif edilib. Əvvəllər onlardan biri 2019-cu ildə eyni hərrac evində 1,5 milyon funt-sterlinqə satılaraq indiyə qədər ən bahalı içki rekordunu qırmışdı. Hər iki hərracda şüşələri kimin aldığı açıqlanmayıb.

"Sotheby's" hərrac evi, 1926-cı ildə istehsal olunan 40 şüşənin müxtəlif üsullarla etiketləndiyini açıqlayıb. Şüşələrdən ikisinin heç bir etiketi olmayıb. Onlardan 14-nə brendin klassik "Fine & Rare" etiketi yapışdırılıb. 12-nin üzərində isə britaniyalı pop sənətçisi Peter Blake tərəfindən hazırlanmış etiketlər vurulub. Son satılan viski də daxil olmaqla 12 şüşənin etiketi italyan rəssamı Valerio Adami tərəfindən hazırlanıb. Adaminin hazırladığı etiketlərin yapışdırıldığı şüşələrdən neçəsinin salamat olduğu məlum deyil. Onlardan birinin 2011-ci ildə Yaponiyada baş verən zəlzələ zamanı qırıldığı, digərinin isə içildiyi güman edilir.

Elmir