Bəzən biznesə yeni başlayanlara deyilir ki, şəxsi əlaqələrin geniş olmalıdır. Əlaqələrin yaxşı olsa, müştəri cəlb etmək daha rahat olar, biznesini sürətli inkişaf etdirə bilərsən. Əlaqələrin yoxdursa, biznesə başlamaq çox çətindir. Həqiqətən elədir? Biznesimizdə əlaqələrimiz nə dərəcədə rol oynayır?

“Networking Azərbaycan”ın həmtəsisçisi Orxan Hacıyev Valyuta.az-a bildirdi ki, əlaqələrin geniş olmağı üstünlükdür, amma olmaması da biznes qurmağa əngəl deyil: “Təbii ki ətrafın geniş olması ilkin mərhələlərdə biznes üçün yaxşı imkanlar aça bilər. Əlaqələrin geniş olması böyük avantaj yaradır, amma olmaması belə biznesə əngəl olmamalıdır”.

O.Hacıyev deyir ki, əlaqələri geniş olan sahibkarın biznesi daha sürətlə inkişaf edir: “İki restoranı misal götürək. Hər birində xidmət, məhsullar, restoranın interyeri eynidir, hər ikisi yüksək səviyyədə restorandır. Deyək ki, birinin sahibinin əlaqələri genişdir, digərinki azdır.

Əlaqələri geniş olan sahibkarın uğur qazanma şansı daha çoxdur. Çünki onun özəyi yaxşıdır, işi yaxşı qurub, həm də əlaqələri də çox genişdir. Mütləq ki, onun biznesi daha yaxşı irəliləyəcək”. 

Orxan bəy əlaqələrdən düzgün istifadə edilməli olduğunu da vurğuladı: “Əlaqələrdən düzgün istifadə etmək lazımdır. Ola bilər ki, sizin əlaqələriniz genişdir, amma onlardan istifadə etməyi, həmin insanlarla düzgün ünsiyyət qurmağı və əlaqələri möhkəmləndirməyi bacarmırsınız. Belə olduğu halda, əlaqələriniz sizə kömək edə bilməz”.

Nuray