2023-cü ilin əvvəlindən planetin ən varlı adamları reytinqinə daxil olan 25 rusiyalı milyarderin ümumi sərvəti 24 milyard dollar artıb.

Valyuta.az xəbər verir ki, bunu Bloomberg Milyarderlər İndeksinin (BBI) məlumatları sübut edir.

Noyabrın 1-nə onların məcmu kapitalı 302,5 milyard dollar qiymətləndirilir. Reytinqin lideri Vladimir Potanin (İnterros) sərvətini 781 milyon dollar artıraraq 29,4 milyard dollara çatdırıb.

İkinci yeri 3,05 milyard dollar (cəmi 27,7 milyard dollar) qazanan “Sibur” və “Novatek” şirkətlərinin ortaq sahibi Leonid Mixelson tutur.

Azərbaycanlı milyarder, "Lukoil"in təsisçisi Vahid Ələkbərov üçüncü yerə yüksəlib - sərvətini 7,83 milyard artaraq 23,2 milyard dollara çatdırıb. Bundan başqa, o, kapital artımında digər milyarderlər arasında lider olub.

Reytinqə görə, ən böyük itkiyə Süleyman Kərimov verib - onun sərvəti 1,55 milyard dollar azalaraq 7,44 milyard dollara düşüb.

Oktyabrda milyarderlərin sərvəti daha 21 milyard dollar, o cümlədən Vahid Ələkbərovun sərvəti 6,4 milyard dollar artıb.

Bloomberg Milyarderlər İndeksi milyarderlərin öz səhmlərinə sahib olduqları şirkətlərin səhmlərinin bazar dəyəri əsasında hesablanır. Reytinqdə ilk üç pilləni hələ İlon Mask (195 milyard dollar), Bernard Arno (157 milyard dollar) və Ceff Bezos (156 milyard dollar) tutur.

Paşa Məmmədli