Hələ də fermerlər öz təsərrüfatlarını yaratmaq və inkişaf etdirmək üçün banklardan kredit almaqda çətinlik çəkirlər. Ölkəmizdə çoxdan iri və yaxud kiçik olmaqla fermer təsərrüfatları yaranıb. Eyni zamanda, bu illər ərzində bank sistemi də inkişaf edib. Amma yenə də banklar digər sahələrlə müqayisədə, kənd təsərrüfatı ilə məşğul olan fermerlərə kredit verməkdə maraqlı deyillər.

İqtisadi və Sosial İnkişaf Mərkəzinin sədri Rəşad Həsənov Valyuta.az-a açıqlamasında bildirib ki, hazırkı şərtlər daxilində sözügedən sektor banklar üçün səmərəli deyil:

“Fermer təsərrüfatları üzrə də bazar şərtləri uyğun olsa, məmuniyyətlə banklar həmin sektora da pul yatırar. İndiki şərtlər daxilində bir neçə ciddi amil kənd təsərrüfatının maliyyələşməsi istiqamətində bank sektorunun maraqlarına mənfi təsir edir. Bunlar aşağıdakılardır: Aqrar sektorda uçot yoxdur. Bu sahədə fəaliyyət göstərən müəssisələrin mənfəət göstəricilərini müəyyən etmək çətindir”. 

Həmsöhbətimizə görə, burada risk amili də yüksəkdir: 

“Aqrar sahədə məhsuldarlıq təbii faktorlardan asılıdır. Belə olan halda, təminat, sığorta mexanizmləri dövriyyəyə daxil olmalıdır. Amma ölkəmizdə aqrar sığortanın əhatəliyi də zəifdir, cəmi 4-5 faiz nisbətindədir. Digər tərəfdən, banklar kredit vermək üçün likvid aktivlər tələb edir. Bu zaman ucqarda fəaliyyət göstərən fermerdən də Bakı şəhəri və ya Abşeron yarımadasında yerləşən daşınmaz əmlakın girov qoyulması tələb olunur. Banklar bu tələbi ödəmək imkanında olmayan fermerlərin müraciətini belədə müsbət dəyərləndirmir. Banklar həmçinin, aqrar sektor üzrə daşınmaz əmlakın girovluğu məsələsinə isti yanaşmır. Çünki həmina aktivlərin sığortası yoxdur. Habelə kənd sakinlərinin əksəriyyəti daha çox ailə təsərrüfatlarına üstünlük verir. Kənd təsərrüfatında istehsal olunan məhsulların 90 faizi məhz ailə təsərrüfatları və fərdi təsərrüfatlarda istehsal olunur. Onlarla maliyyə münasibətlərinin qurulması isə çətindir. Çünki burada mühasibatlıq, hesabatlılıq yoxdur”. 

Ramiz