"Meta" şirkəti, 2030-cu illərin əvvəlində istifadəyə veriləcək sistemlər üçün nüvə enerjisi üzrə mütəxəssislər axtardığını açıqlayıb.  

Artan enerji tələbatını ödəmək üçün nüvə enerjisinə yönələn şirkətlər arasında xüsusi diqqət çəkən "Meta", "Facebook", "Instagram" və "WhatsApp" platformalarının sahibi olaraq, süni intellekt və davamlılıq məqsədləri çərçivəsində nüvə enerji layihələrinə üstünlük verdiyini bildirib.  

Valyuta.Az-ın "Bloomberg"ə istinadən verdiyi xəbərə əsasən şirkətin açıqlamasında qeyd edilib ki, həm "Meta"nın məlumat mərkəzlərinin, həm də onların yerləşdiyi bölgələrdəki elektrik şəbəkələrinin genişlənən enerji tələbatını qarşılamaq üçün nüvə enerjisi xüsusi əhəmiyyət daşıyır.  

Açıqlamada bu ifadələr yer alıb:  

 "Meta olaraq, daha təmiz, etibarlı və müxtəlifləşdirilmiş elektrik şəbəkəsinə keçiddə nüvə enerjisinin əsas rol oynayacağına inanırıq."  

Bu səbəbdən, süni intellekt və davamlılıq məqsədlərinə nail olmaq üçün nüvə enerjisi üzrə mütəxəssislərin seçilməsi üçün tender elan ediləcəyi bildirilib.  

⇒ "Meta"nın istehsal planı

Məqsəd, 2030-cu illərin əvvəlindən başlayaraq ABŞ-da 1-4 gigavatlıq yeni nüvə enerji istehsalı gücü əlavə etməkdir. Bununla yanaşı, yeni nüvə generatorlarının inkişafını sürətləndirmək, miqyaslanma vasitəsilə xərcləri azaltmaq və karbon emissiyasını minimuma endirmək üçün təşəbbüslərin vacib olduğu vurğulanıb.  

Açıqlamada həmçinin bildirilib ki, bu stansiyaların lisenziyalaşdırılması, layihələndirilməsi, mühəndisliyi, maliyyələşdirilməsi, tikintisi və idarə olunması üçün tərəfdaşlarla işləmək, nüvə texnologiyasını sürətləndirmək üçün uzunmüddətli baxışı təmin edəcək.  

⇒ Texnologiya şirkətlərinin nüvə enerjisinə marağı

"Meta"nın nüvə enerjisi üzrə mütəxəssislər axtarması, artan enerji tələbatını qarşılamaq üçün nüvə enerjisinə yönələn texnologiya şirkətlərinin marağını əks etdirir.  

"Microsoft", sentyabr ayında "Three Mile Island" enerji stansiyasındakı əməliyyatların yenidən başlaması üçün razılaşma imzalamışdı.  

"Google" isə oktyabr ayında kiçik modul reaktor ("SMR") inkişaf etdiricisi "Kairos Power"dən enerji alacağını elan etmişdi.  

Həmin ay "Amazon", karbon emissiyasını sıfıra endirmək planının bir hissəsi olaraq "SMR" müqavilələri bağladığını bildirmişdi.  

Rəhim