Minnesota ştatında yerləşən nəhəng ərzaq istehsalı şirkəti "Cargill" qlobal işçi qüvvəsinin təxminən 5%-ni ixtisar edir. Bu addım, ərzaq xammalı qiymətlərinin azalması fonunda atılır.  

Valyuta.Az xəbər verir ki, "Forbes"ə görə, "Cargill" Amerikanın ən böyük özəl şirkətidir və dünyada ən iri kənd təsərrüfatı malları ticarətçisidir. Şirkət bazar ertəsi "CNN"ə verdiyi açıqlamada, bu dəyişikliklərin bu ilin əvvəlində müəyyən edilmiş "uzunmüddətli strategiyanın" bir hissəsi olduğunu bildirib.  

"Cargill" ərzaq maddələrinin tədarükü sahəsində önəmli rol oynayır. Daha sadə dillə desək, şirkət dünyada taxıl, ət və digər kənd təsərrüfatı məhsullarını paylayan vasitəçidir. Pandemiya və onun ardınca yaranan inflyasiya, habelə qlobal siyasi gərginlik ərzaq qiymətlərində dəyişikliklərə səbəb olduğu üçün "Cargill" həmin dövrdə böyük gəlir əldə etmişdi. Lakin indi ərzaq məhsullarının qiymətləri enir.  

Bundan əlavə, ABŞ Kənd Təsərrüfatı Departamentinin məlumatına görə, ABŞ-da mal-qara sayı azalıb. "Cargill" Şimali Amerikada ən iri ət emalı müəssisələrindən biri olmaq üçün böyük investisiyalar edib.  

"Bloomberg" bu ilin əvvəlində verdiyi məlumata əsasən şirkətin mənfəəti may ayında başa çatan maliyyə ilində 2.48 milyard dollara düşüb. Bu göstərici 2021-2022-ci illərdə əldə etdiyi rekord 6.7 milyard dollardan çox aşağıdır və 2016-cı ildən bəri ən aşağı mənfəət səviyyəsidir.  

Şirkətin 2024-cü il hesabatına görə, "Cargill" 160,000-dən çox işçiyə sahibdir. Bu o deməkdir ki, təxminən 8,000 iş yeri ixtisara düşəcək. Şirkətin prezidenti və baş direktoru 2023-cü ildən etibarən Brayan Sayksdır (Brian Sikes).  

İyun ayında "Cargill" Atlanta şəhərində yeni bir mərkəz açacağını və texnologiya və mühəndislik sahəsində 400 yeni işçi cəlb edəcəyini elan etmişdi.  

“Gələcəyə baxaraq, rəqabət qabiliyyətimizi maksimum dərəcədə artırmaq, cəlbedici trendlərdən faydalanmaq və hər şeydən öncə müştərilərimiz üçün ən yaxşı xidməti göstərməyə davam etmək üçün aydın bir plan hazırlamışıq,” deyə şirkət "CNN"ə verdiyi açıqlamada bildirib.

Rəhim