"Apple" şirkəti Çində ciddi çətinliklərlə üzləşir. Bu, "iPhone" cihazlarında süni intellekt (Al) funksiyalarının olmaması və yerli istehsalçıların güclənməsi ilə bağlıdır. "Huawei" kimi şirkətlər Al funksiyalarını artıq yerli tələblərə uyğunlaşdıraraq bazarda üstünlük qazanıblar.

Valyuta.az xəbər verir ki, bu barədə "Telecoms Tech News" (TTN) nəşri yazıb.

Çin tənzimləyici qurumları xarici cihaz istehsalçılarından istifadə etdikləri süni intellekt funksiyalarının təsdiqlənməsi üçün xüsusi lisenziyalar təqdim etməyi tələb edir. Bu səbəbdən "Apple" öz Al funksiyalarını təqdim etmək üçün "Baidu", "ByteDance" və ya "Moonshot" kimi yerli süni intellekt şirkətləri ilə əməkdaşlıq etməlidir.

Bu vəziyyət "Apple"ın Çin bazarındakı rəqabət üstünlüyünü təhlükə altına alır. Yerli istehsalçılar artıq Çin hökumətinin təsdiqini almış süni intellekt həlləri ilə bazara çıxaraq, mövqelərini gücləndirirlər. Analitiklər hesab edirlər ki, "Apple" bu şirkətlərlə əməkdaşlıq etmədiyi halda, süni intellekt funksiyalarını Çin bazarına gətirməkdə gecikmə ilə üzləşə bilər. Bu gecikmənin ən azı 2025-ci ilin ikinci yarısına qədər davam edəcəyi proqnozlaşdırılır.

"Apple" hazırda Çin xaricində süni intellekti tətbiq etmək üçün məlumatların cihazda, xüsusi bulud serverlərində və bəzi hallarda "OpenAI" serverlərində emalını əsas götürür. Lakin Çində bütün süni intellekt modellərinin ciddi şəkildə test olunmasını tələb edən tənzimləmə qaydaları bu yanaşmanı çətinləşdirir.

"Apple"ın Çin bazarında mövqelərini qoruyub saxlamaq üçün necə bir strategiya seçəcəyi maraqla gözlənilir. 

Paşa Məmmədli