“Havaların isti keçməsi, məsuliyyətsizlik və cəzasızlıq mühiti istirahət mərkəzlərində zəhərlənmələrin sayının artmasına şərait yaradır”. 

Bunu Valyuta.az-a açıqlamasında Liberal İqtisadçılar Mərkəzinin sədri Akif Nəsirli son zamanlar istirahət mərkəzlərində qidadan zəhərlənmə hallarının artmasına münasibət bildirərkən deyib:

“İndi havalar isti keçir. Bu şəraitdə qida məhsulları sürətlə sıradan çıxır. Ona görə də normal soyuducusu olmayan istirahət mərkəzlərində qida məhsulları da tez xarab olur. Bu da həmin istirahət mərkəzlərinə rəhbərlik edən sahibkarların məsuliyyətsizliyindən qaynaqlanır. Öz növbəsində məsuliyyətsizlik də arxayınçılıq yaradır. Sahibkar obyektində baş verən zəhərlənmə halı ilə reputasiyasının aşağı düşməsinə rəğmən, rəqibinin olmaması səbəbindən müştərilərindən məhrum olmayacağından arxayındır”. 

Ekspertə görə, qida təhlükəsizliyinə cavabdeh olan qurumun normal fəaliyyət göstərməməsi də istirahət mərkəzlərində belə halların artmasına rəvac verir:

“Ölkədə ümumiyyətlə qida təhlükəsizliyi sistemi qurulmayıb. İstirahət mərkəzində zəhərlənən insan bu halın baş verməsinə həmin obyektin işinin səbəb olduğunu heç bir yerdə sübut edə bilmir. Bunun üçün o, əlinə sənəd ala bilmir ki, onları məhkəməyə versin. Yəni cəzasızlıq mühiti də belə vəziyyətin yaranmasına səbəb olur”. 

Ramiz