“Məktəb direktorunun bu məsələdə şəxsi marağı qaçılmaz olur" - Ekspert
“Son 3 il ərzində kifayət qədər neqativ halların olması, vəzifə təyinatı, əməyin qiymətləndirilməsi ilə bağlı pozuntular, təhsil mühitinin ciddi şəkildə pozulması medalçıların sayının azalmasına gətirib çıxarıb”.
Bunu Valyuta.az-a açıqlamasında təhsil eksperti Kamran Əsədov Bakı şəhəri üzrə XI sinif məzunlarından 24 nəfərin qızıl və gümüş nişana layiq görülməsindən danışarkən deyib.
Onun sözlərinə görə, orta təhsilin ən ali mükafatlarını almaq üçün şagird respublika fənn olimpiadalarının yekun mərhələsində, ölkə və beynəlxalq səviyyəli bilik yarışlarında, müsabiqə və layihələrdə mükafata layiq görülməli, eyni zamanda ümumi orta təhsil səviyyəsini 75% əla qiymətlərlə bitirməlidir:
“Şagirdin qızıl və ya gümüş medalla təltifi üçün namizədliyinin verilməsi məsələsinə sinif rəhbərinin təqdimatı əsasında məktəbin Pedaqoji Şurasında baxılır və müvafiq qərar verilir. Pedaqoji Şuranın qərarı ilə həmin şagirdlərin fərdi siyahısı hər il mayın 20-dən gec olmayaraq yerli təhsil idarəetmə orqanları tərəfindən Elm və Təhsil Nazirliyinə təqdim edilir. Qızıl medala attestata yazılan yekun qiymətləri yalnız "əla" olanlar, attestata yazılan yekun qiymətlərdən ən çox ikisi - "Tədris dili" və "Riyaziyyat" istisna edilməklə, yaxşı olanlar isə gümüş medala layiq görülürlər”.
Ekspert bu prosedurların keçirılməsinin bir çox hallarda şəffaf olmadığını qeyd edib:
“Məktəb direktorunun bu məsələyə yaxından müdaxiləsi, şəxsi marağı qaçılmaz olur. Direktora bu və ya digər formada yaxın olan şəxslər bu adı almaq üçün təqdim olunur, amma istedadlı, bacarıqlı, lakin diektora yaxın olmayan şagirdlər isə bu mükafatlardan kənarda qalır. Əvvəlki illərlə müqayisə medalların sayının kəskin azaldığını görürük. 2012-2016-cı illərdə qızıl və gümüş medal alan şagirdlərin sayına diqqət etsək, azalma olduğunu müşahidə edərik. 2014-2015-ci tədris ilinin yekunlarına görə, ümumi təhsili xüsusi nailiyyətlərlə başa vuran şagirdlərdən 131 nəfəri qızıl, 21 nəfəri gümüş medalla, 2013-2014-cü dərs ilinin yekununda 176 nəfər qızıl, 25 nəfər gümüş medalla təltif olunub. Qızıl və gümüş medalla təltif olunmağa görə rekord göstərici 2012-2013-cü tədris ilində olub. Həmin dərs ilində orta məktəbin 11-ci sinfini 238 şagird qızıl, 10 şagird isə gümüş medala bitirib. Ondan əvvəlki il isə medal alanların sayı az olub. 2011-2012-ci tədris ilində 138 nəfər orta məktəbi xüsusi nailiyyətlərlə başa vurub. Onların 118-i qızıl, 20-si gümüş medal alıb. Ən az rəqəm isə 2011-ci ildə olub. Həmin il Azərbaycanda şagirdlərdən 37-si qızıl, 16-sı gümüş medala layiq görülüb”.
Kamran Əsədov indiyə kimi ümumilikdə 960 şagird orta məktəbi medalla başa vurduğunu vurğulayıb:
“Onlardan 839-u qızıl, 121-i isə gümüş medal alıb. 2018-ci ildə, 185 məzun qızıl, 38-məzun isə gümüş medala layiq görülüb. Təəssüf ki, bu qədər qızıl medal alanlar arasında kifayət qədər aşağı bal toplayanlar var. Bu onu göstərir ki, qızıl medalların verilməsi zamanı ciddi qanun pozuntuları, neqativ hallar var. 2013-cü ildə qəbul edilmiş təhsilininkişafı üzrə dövlər stategiyasına görə təhsilin əhatə dairəsi genişlənməlidir, əlçatımlılıq təmin olunmalıdır. Həqiqətən də Azərbaycanda ali təhsilli əhalinin sayının az olduğuna görə bu vacibdir. Hazırda ölkə vətndaşımızın yalnız 17 faizi ali təhsillidir”.
Qeyd edək ki, Bakı Şəhər Təhsil İdarəsi tabeliyində olan ümumi təhsil müəssisələrində məzunların qızıl və gümüş nişana layiq görülməsini açıqlayıb. Məlumatda XI sinif məzunlarından 18-i qızıl, 6-sı gümüş nişana layiq görüldüyü bildirilir.
Aylin
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay