“Elm və Təhsil Nazirliyi müəllimlərin peşəkarlığının artırılması adı altında dövlət büdcəsini kifayət qədər talayır. Bu birmənalıdır”.

Bunu Valyuta.az-a açıqlamasında təhsil eksperti Kamran Əsədov deputat Ceyhun Məmmədovun zəif müəllimlərin təhsil aldığı ali təhsil müəssisələrinin adlarının ictimaiyyətə açıqlanması ilə bağlı təklifini şərh edərkən deyib. 

O bildirib ki, ilk dəfə Azərbaycan müəllimləri sertifikasiyaya cəlb olunub:

“Azərbaycanda orta məktəblərdə çalışan müəllimlər bilik və bacarıqlarını yoxlanılmasına 2014-cü ildə diaqnostik qiymətləndirmədən başlanılıb. Həmin vaxt nəticələr ürək açan deyildi. Bizim 50%-ə kimi müəllimlərimiz çox aşağı nəticə toplamışdılar. Amma bu müddətdə Elm və Təhsil Nazirliyi orta məktəblərdə çalışan müəllimlərin peşəkarlıq səviyyəsinin artırılması üçün ciddi işlər görməmişdi. Baxmayaraq ki, hər il Elm və Təhsil Nazirliyi, Təhsil İnstitutu, idarə və təşkilatlar, hətta nazirliyin qrant ayırdığı QHT-lər təhsilin və müəllimin keyfiyyətinin artırılması ilə bağlı tədbirlər keçirirdi. Ön çox dövlət büdcəsindən Elm və Təhsil Nazirliyinə ayrılmış pulun böyük hissəsi müəllimlərin peşəkarlıq səviyyəsinin artırılmasına ayrılsa da keyfiyyət istiqamətində heç bir addım atılmayıb”.

Kamran Əsədov müəllimlərin işə qəbulu həyata keçiriləndən bu günə kimi bütün universitetlərdən gələn müəllimlərin bilik və bacarığı haqqında Elm və Təhsil Nazirliyində məlumat olduğunu vurğulayıb:

“Biz nə görürük? İmtahanlarda nəticələri zəif olan müəllimlərin direktorları ilə daha yaxşı münasibətdə olurlar. Belə olmaz. Deputat da düz deyir, bu gün ali məktəblərin əksəriyyəti müasir təhsil sisteminin tələblərinə cavab vermir”.

Qeydcedək ki, Milli Məclisin deputatı Ceyhun Məmmədov mətbuata açıqlamasında Elm və Təhsil Nazirliyini ittiham edib. Deputat “Elm və Təhsil Nazirliyi bildirir ki, bəzi müəllimlər hansısa sözü yaza bilmir və ya çubuqlu bölməni edə bilmir. Əgər biz bütün acı həqiqətləri demək istəyiriksə, onda nazirlik desin görək, bu tələbələr hansı universitetləri bitiriblər, onlar da bundan nəticə çıxarsınlar. Bu ali təhsil müəssisələrinin adları ictimaiyyətə açıqlanmalıdır” deyə bildirib.

Aylin